പമ്പയിലെ ആശുപത്രിയില് ഗുരുതര വീഴ്ച; സര്ജിക്കല് ബ്ലേഡ് ബാന്ഡേജിനുള്ളില് വച്ച് കെട്ടി
പത്തനംതിട്ട: പമ്പയിലെ ആശുപത്രിയില് തീര്ത്ഥാടകര്ക്ക് ലഭിക്കുന്ന ചികില്സയില് ഗുരുതര വീഴ്ച. കാലിലെ മുറിവ് സര്ജിക്കല് ബ്ലേഡ് അകത്ത് വച്ച് കെട്ടി എന്നാണ് ആരോപണം. ശബരിമല തീര്ത്ഥാടകയാണ് സംഭവം വെളിപ്പെടുത്തിയത്. സര്ജിക്കല് ബ്ലേഡ് ഉപയോഗിച്ച് സ്കിന് കട്ട് ചെയ്യുന്നത് കണ്ടപ്പോള് അവര്ക്ക് പരിചയക്കുറവ് തോന്നി. പിന്നീട് മറ്റൊരു ആശുപത്രിയില് പൊയ്ക്കോളാമെന്ന് പറയുകയും വീട്ടിലെത്തി മുറിവ് തുറന്ന് നോക്കിയപ്പോള് സര്ജിക്കല് ബ്ലേഡ് അകത്ത് വെച്ച് ബാന്ഡേജ് ചെയ്തത് കണ്ടെന്നും പ്രീത പറഞ്ഞു.സംഭവത്തില് പമ്പാ ആശുപത്രി അധികൃതര്ക്കെതിരെയാണ് പ്രീത പരാതി നല്കി.
പന്തളത്ത് നിന്ന് തിരുവാഭാരണഘോഷയാത്രക്കൊപ്പം പദയാത്രയായാണ് പ്രീത പമ്പയിലെത്തിയത്. കാലില് മുറിവുണ്ടായതിനെ തുടര്ന്ന് പ്രീത പമ്പയിലെ ആശുപത്രിയിലെത്തി മുറിവ് ഡ്രസ് ചെയ്തിരുന്നു. തിരിച്ചു പോരുമ്പോഴും മുറിവ് ഡ്രസ് ചെയ്യാനായി ആശുപത്രിയിലെത്തുകയായിരുന്നു. ഡോക്ടര് ഏല്പ്പിച്ച സഹായിയുടെ പെരുമാറ്റത്തില് അസ്വാഭാവികത തോന്നിയപ്പോള് നേഴ്സ് ആണോയെന്ന് ചോദിച്ചു.
എന്നാല് നേഴ്സിംഗ് അസിസ്റ്റന്റ് ആണെന്നായിരുന്നു മറുപടി. മുറിവിലെ തൊലി മുറിക്കാന് തുടങ്ങിയപ്പോള് വേണ്ടെന്ന് പറഞ്ഞ പ്രീത ബാന്ഡേജ് മതിയെന്ന് പറഞ്ഞു. പിന്നീട് വീട്ടിലെത്തി മുറിവ് തുറന്നുനോക്കിയപ്പോഴാണ് സര്ജിക്കല് ബ്ലേഡ് ബാന്ഡേജിനുള്ളില് കണ്ടത്.