'ക്രിസ്മസ് ആഘോഷങ്ങള്ക്കു നേരെയുള്ള അതിക്രമങ്ങള്ക്കു പിന്നില് സംഘപരിവാര്'; മുഖ്യമന്ത്രി
തിരുവനന്തപുരം: സംസ്ഥാനത്ത് ക്രിസ്മസ് ആഘോഷങ്ങള്ക്കു നേരെ നടന്ന ആക്രമണങ്ങളില് പ്രതികരിച്ച് മുഖ്യമന്ത്രി പിണറായി വിജയന്. എല്ലാ ആക്രമണങ്ങള്ക്കു പിന്നിലും സംഘപരിവാറാണെന്ന് മുഖ്യമന്ത്രി. ക്രിസ്മസ് ആഘോഷങ്ങളെ കടന്നാക്രമിക്കുന്ന അവസ്ഥ അസ്വസ്ഥരാക്കുന്നതാണ്. വിവിധ സംസ്ഥാനങ്ങളില് വ്യാപകമായി ഇത്തരം ആക്രമണം നടക്കുന്നു. യുപിയില് ക്രിസ്മസ് അവധി പോലും റദ്ദാക്കിയെന്ന് മുഖ്യമന്ത്രി പറഞ്ഞു. ലോകത്തിനാകെ വെളിച്ചം പകരുന്ന നന്മയുടെയും സമാധാനത്തിന്റെയും സന്ദേശത്തിന്റെയും പ്രഭ കെടുത്തും വിധം ക്രിസ്മസ് ആഘോഷങ്ങളെ കടന്നാക്രമിക്കുന്ന അവസ്ഥ നമ്മെ അസ്വസ്ഥരാക്കുന്നതാണെന്നും ഇതിനെല്ലാം പിന്നില് സംഘപരിവാറാണെന്നും മുഖ്യമന്ത്രി പത്രമ്മേളനത്തില് പറഞ്ഞു.
പാലക്കാട് കുട്ടികളടങ്ങുന്ന കരാള് സംഘത്തിനു നേരെ സംഘപരിവാര് ആക്രമണം ഉണ്ടായി. ഈ അക്രമി സംഘത്തെ ബിജെപി നേതാക്കള് ന്യായീകരിക്കുകയാണ് ചെയ്യുന്നത്. കരാള് സംഘങ്ങളെ അപമാനിക്കുന്ന രീതിയില് മുതിര്ന്ന നേതാക്കള് പരാമര്ശം നടത്തി. അക്രമികള്ക്കെതിരേ കര്ശന നടപടി സ്വീകരിക്കുമെന്ന് മുഖ്യമന്ത്രി വ്യക്തമാക്കി. സ്കൂളുകളിലും ക്രിസ്മസ് ആഘോഷങ്ങള്ക്കെതിരെ ആര്എസ്എസ് അനുകൂല സംഘടനകളില് നിന്ന് ഭീഷണി ഉണ്ടായി. ചില സ്കൂളുകള് ക്രിസ്മസ് ആഘോഷം ഒഴിവാക്കി. വിദ്യാര്ഥികളില് നിന്ന് വാങ്ങിയ പണം തിരികെ നല്കുകയും ചെയ്തു. ഇത്തരം സംഭവങ്ങളെക്കുറിച്ച് അടിയന്തര അന്വേഷണം നടത്താന് നിര്ദ്ദേശം നല്കിയതായി മുഖ്യമന്ത്രി അറിയിച്ചു. മതപരമായ വിവേചനം കാണിക്കുന്ന സ്കൂളുകള്ക്കെതിരേ കര്ശന നടപടിയുണ്ടാകുമെന്ന് മുഖ്യമന്ത്രി മുന്നറിയിപ്പ് നല്കി. കേരളത്തില് ഇത്തരം ശക്തികള് തലപൊക്കുന്നത് ഗൗരവത്തോടെ കാണുന്നു. കഴിഞ്ഞവര്ഷം കേക്കും കൊണ്ടെത്തിയവരാണ് ഇത്തവണ ആക്രമണം നടത്തുന്നത്. ഇതര മത വിദ്വേഷം പരത്തി മതേതരത്വത്തെ കളങ്കപ്പെടുത്തുന്നതാണ് ഇത്തരം സംഭവങ്ങളെന്ന് മുഖ്യമന്ത്രി പറഞ്ഞു.