ശബരിമല മകരവിളക്ക്; ഇടുക്കിയില് അഞ്ച് പഞ്ചായത്തുകളിലെ സ്കൂളുകള്ക്ക് നാളെ അവധി
പത്തനംതിട്ട ജില്ലയില് ശബരിമല മകരവിളക്കിനോട് അനുബന്ധിച്ച് നാളെ പ്രാദേശിക അവധി പ്രഖ്യാപിച്ചിട്ടുണ്ട്
ഇടുക്കി: ശബരിമല മകരവിളക്ക് പ്രമാണിച്ച് ഇടുക്കിയിലെ അഞ്ച് പഞ്ചായത്തുകളിലെ സ്ക്കൂളുകള്ക്ക് നാളെ അവധി പ്രഖ്യാപിച്ച് ജില്ല കളക്ടര്. കുമളി, വണ്ടിപ്പെരിയാര്, പീരുമേട് പെരുവന്താനം, കൊക്കയാര് എന്നീ പഞ്ചായത്തുകളിലാണ് അവധി. മുഴുവന് വിദ്യാര്ഥികളും താമസിച്ചു പഠിക്കുന്ന റസിഡന്ഷ്യല് വിദ്യാഭ്യാസ സ്ഥാപനങ്ങള്ക്ക് അവധി ബാധകമായിരിക്കില്ല. മുന്കൂട്ടി നിശ്ചയിച്ച പരീക്ഷകള്ക്കും, ഇന്റര്വ്യൂകള്ക്കും മാറ്റമുണ്ടായിരിക്കില്ലെന്നും കളക്ടര് അറിയിച്ചു. ഈ അവധി മൂലം നഷ്ടപ്പെടുന്ന പഠന സമയം ഓണ്ലൈന് ക്ലാസുകള് ഉള്പ്പടെ നടത്തി ക്രമീകരിക്കുന്നതിന് വിദ്യാഭ്യാസ സ്ഥാപന മേധാവികള് നടപടി സ്വീകരിക്കേണ്ടതാണെന്നും ജില്ലാ കളക്ടര് അറിയിച്ചു.
അതേസമയം, പത്തനംതിട്ട ജില്ലയില് ശബരിമല മകരവിളക്കിനോട് അനുബന്ധിച്ച് നാളെ പ്രാദേശിക അവധി പ്രഖ്യാപിച്ചിട്ടുണ്ട്. ജില്ലാ കളക്ടറാണ് അവധി പ്രഖ്യപിച്ച് ഉത്തരവിട്ടത്. ജില്ലയിലെ എല്ലാ സര്ക്കാര് ഓഫീസുകള്ക്കും വിദ്യാഭ്യാസ സ്ഥാപനങ്ങള്ക്കും അവധി പ്രഖ്യാപിച്ചിട്ടുണ്ട്. മുന്കൂട്ടി നിശ്ചയിച്ച പൊതുപരീക്ഷകള്, സര്വകലാശാലാ പരീക്ഷകള് എന്നിവയ്ക്ക് മാറ്റമുണ്ടായിരിക്കില്ല. അവശ്യ സര്വീസുകളില് ജോലി ചെയ്യുന്ന ജീവനക്കാര്ക്കും ഈ അവധി ബാധകമല്ലെന്നും കളക്ടര് അറിയിച്ചു. പൊങ്കല് പ്രമാണിച്ച് വ്യാഴാഴ്ച്ചയും പത്തനംതിട്ട ജില്ലയില് അവധിയാണ്.