പട്ന: രാജ്യസഭാ തിരഞ്ഞെടുപ്പിനായി നിതീഷ് കുമാര് നാമനിര്ദേശപത്രിക സമര്പ്പിച്ചു. ബിഹാറില് മുഖ്യമന്ത്രിസ്ഥാനം ബിജെപി ഏറ്റെടുക്കും. രാജ്യസഭാ തിരഞ്ഞെടുപ്പിനായി നാമനിര്ദ്ദേശ പത്രിക സമര്പ്പിച്ച അഞ്ച് എന്ഡിഎ സ്ഥാനാര്ഥികളില് ഒരാള് ബീഹാര് മുഖ്യമന്ത്രി നിതീഷ് കുമാറാണ്. നിതീഷ് കുമാറിന്റെ മകന് നിഷാന്ത് കുമാറിനെ ഉപമുഖ്യമന്ത്രിയാക്കാനും ധാരണയായി. ബിജെപി പ്രസിഡന്റ് നിതിന് നബിനും രാജ്യസഭയിലേക്ക് പട്നയില് നിന്നുണ്ട്. കേന്ദ്ര ആഭ്യന്തരമന്ത്രി അമിത് ഷാ, മുഖ്യമന്ത്രി സാമ്രാട്ട് ചൗധരി തുടങ്ങിയവരുടെ സാന്നിധ്യത്തിലാണ് നിതിഷ് കുമാറും ബിജെപി ദേശീയ അധ്യക്ഷന് നിതിന് നബിന് അടക്കമുള്ള അഞ്ച് എന്ഡിഎ സ്ഥാനാര്ഥികളും നിയമസഭാ സെക്രട്ടറി ഖ്യാതി സിങ്ങിന്റെ ഓഫീസിലെത്തി നാമനിര്ദ്ദേശ പത്രിക സമര്പ്പിച്ചത്.
ബിജെപി സംസ്ഥാന ജനറല് സെക്രട്ടറി ശിവേഷ് കുമാര്, ജെഡിയുവിന്റെ രാം നാഥ് താക്കൂര്, ആര്എല്എമ്മിന്റെ ഉപേന്ദ്ര കുശ്വാഹ എന്നിവരാണ് രാജ്യസഭയിലേക്ക് നാമനിര്ദ്ദേശ പത്രിക സമര്പ്പിച്ച മറ്റ് എന്ഡിഎ സ്ഥാനാര്ഥികള്. രാജ്യസഭയിലേക്ക് മല്സരിക്കുകയാണെന്ന് വ്യക്തമാക്കി ജെഡിയു അധ്യക്ഷനും ബിഹാര് മുഖ്യമന്ത്രിയുമായ നിതീഷ് കുമാര് ഇന്നാണ് അഭ്യൂഹങ്ങള് അവസാനിപ്പിച്ചത്. നാമനിര്ദേശ പത്രിക സമര്പ്പിക്കാനുള്ള അവസാന ദിവസത്തിലാണ് നിര്ണായക നീക്കം. ബിഹാറില് ഏറ്റവും കൂടുതല് കാലം അധികാരത്തിലിരുന്ന മുഖ്യമന്ത്രിയാണ് നിതീഷ് കുമാര്. 2005ലാണ് അദ്ദേഹം ആദ്യമായി മുഖ്യമന്ത്രിയായത്.