ഒറ്റപ്പാലം: ഷൊര്ണൂര്–പാലക്കാട് റെയില്വേ ട്രാക്കില് ഇരുമ്പു ക്ലിപ്പുകള് കയറ്റിവച്ച നിലയില്. മായന്നൂര് മേല്പാലത്തിനു സമീപമാണു ക്ലിപ്പുകള് കണ്ടെത്തിയത്. പാളത്തെയും കോണ്ക്രീറ്റ് സ്ലീപ്പറിനെയും ബന്ധിപ്പിക്കുന്ന അഞ്ച് ഇആര് ക്ലിപ്പുകളായിരുന്നു ട്രാക്കിനു മുകളില്. പാലക്കാട് ഭാഗത്തേക്കു ട്രെയിനുകള് കടന്നുപോകുന്ന ട്രാക്കിനു മുകളിലായിരുന്നു ഇരുമ്പു ക്ലിപ്പുകള്. കഴിഞ്ഞ ദിവസം വൈകിട്ട് ആറോടെയാണു സംഭവം. എറണാകുളം-പാലക്കാട് മെമുവിന്റെ ലോക്കോ പൈലറ്റാണ് പാളത്തില് അസ്വാഭാവികത അനുഭവപ്പെട്ടതായി റിപോര്ട്ട് ചെയ്തത്. ട്രെയിന് അട്ടിമറി ലക്ഷ്യത്തോടെ ക്ലിപ്പുകള് വച്ചെന്ന കുറ്റത്തിന് ഒറ്റപ്പാലം പോലിസ് കേസെടുത്തു.