അതിജീവിതയെ അപമാനിച്ചെന്ന കേസ്: രാഹുല് ഈശ്വറിന് ജാമ്യമില്ല
രാഹുല് ഈശ്വറിന്റെ ജാമ്യാപേക്ഷ ജുഡീഷ്യല് മജിസ്ട്രേറ്റ് കോടതി തള്ളി
തിരുവനന്തപുരം: രാഹുല് മാങ്കൂട്ടത്തില് എംഎല്എക്കെതിരായ ബലാത്സംഗ കേസിലെ പരാതിക്കാരിയുടെ വിവരങ്ങള് വെളിപ്പെടുത്തിയ കേസില് രാഹുല് ഈശ്വറിന്റെ ജാമ്യാപേക്ഷ തള്ളി കോടതി. ജുഡീഷ്യല് മജിസ്ട്രേറ്റ് കോടതി നാലാണ് ജാമ്യം തള്ളിയത്. ജാമ്യാപേക്ഷ അംഗീകരിക്കാന് കഴിയില്ലെന്നും ജാമ്യത്തെ എതിര്ത്ത് പ്രോസിക്യൂഷന് ചൂണ്ടിക്കാട്ടിയ വാദങ്ങള് തള്ളിക്കളയാനാവില്ലെന്നും കോടതി വ്യക്തമാക്കി. രാഹുല് മാങ്കൂട്ടത്തിലിനെതിരേ പരാതി നല്കിയ യുവതിയെ സമൂഹമാധ്യമത്തിലൂടെ അപമാനിച്ചെന്ന കേസിലാണ് രാഹുല് ഈശ്വര് അറസ്റ്റിലായത്.
നിരാഹാരമിരുന്നതിനാല് ചോദ്യം ചെയ്യാന് കഴിഞ്ഞില്ലെന്ന് പ്രോസിക്യൂഷന് അറിയിച്ചു. തിരഞ്ഞെടുപ്പ് ഡ്യൂട്ടിയായതിനാല് 10ന് കസ്റ്റഡി വേണം. ഫോണും ലാപ്ടോപ്പിന്റെ പാസ് വേര്ഡും നല്കിയില്ല. ഫോണ് വീണ്ടെടുക്കുന്നതിനിടക്കം കസ്റ്റഡി വേണമെന്നും ആവശ്യമെന്നും പ്രോസിക്യൂഷന് അറിയിച്ചു. അന്വേഷണത്തോട് രാഹുല് സഹകരിക്കുന്നില്ലെന്ന പ്രോസിക്യൂഷന്റെ വാദം കോടതി അംഗീകരിച്ചു. കസ്റ്റഡി അപേക്ഷ 10നു പരിഗണിക്കും. നേരത്തെ തെറ്റ് ചെയ്തിട്ടില്ലെന്ന് രാഹുല് ഈശ്വര് കോടതിയില് പറഞ്ഞു. അപ്ലോഡ് ചെയ്ത പോസ്റ്റ് പിന്വലിക്കാമെന്നും രാഹുല് ഈശ്വര് കോടതിയെ അറിയിച്ചു. ജാമ്യ അപേക്ഷയെ ശക്തമായി എതിര്ത്ത് പ്രോസിക്യൂഷന് രംഗത്തെത്തി. കോടതികളെയും നിയമത്തെയും വെല്ലു വിളിക്കുന്ന പ്രവണതയാണ് പ്രതിക്ക്. രാഹുല് ഈശ്വറിനായി പൊലീസ് കസ്റ്റഡി അപേക്ഷ നല്കി. പ്രതി ഒരു തരത്തിലും സഹകരിക്കുന്നില്ലെന്ന് പോലിസ് കോടതിയെ അറിയിച്ചു.
അതേസമയം സൈബര് പോലിസ് അറസ്റ്റ് ചെയ്തു ജയിലില് കഴിയുന്ന രാഹുല് ഈശ്വറിനെ ആരോഗ്യനില മോശമായതിനെ തുടര്ന്ന് മെഡിക്കല് കോളേജില് അഡ്മിറ്റ് ചെയ്തു. ഇന്നലെ ഉച്ചയ്ക്ക് മെഡിക്കല് കോളേജിലെത്തിച്ച് പ്രാഥമിക ചികില്സ നല്കി ജയിലിലേക്ക് കൊണ്ടുപോകാനായിരുന്നു ഉദ്ദേശിച്ചിരുന്നത്. എന്നാല് ആരോഗ്യനില മോശമായതിനെ തുടര്ന്ന് അഡ്മിറ്റ് ചെയ്യാന് ഡോക്ടര്മാര് നിര്ദ്ദേശിക്കുകയായിരുന്നു. ജയിലില് പ്രവേശിപ്പിച്ച ശേഷം നിരാഹാര സമരത്തിലാണ് രാഹുല്. നേരത്തെ മുന്കൂര് ജാമ്യാപേക്ഷ തള്ളിയ രാഹുല് ഈശ്വറിനെ പൂജപ്പുര ജയിലിലേക്ക് മാറ്റിയിരുന്നു. തുടര്ന്ന് ജയിലില് നിരാഹാരം പ്രഖ്യാപിച്ചതോടെ സെന്ട്രല് ജയിലിലേക്ക് മാറ്റുകയായിരുന്നു.