നവകേരള സര്വേയുമായി ബന്ധപ്പെട്ട ഹരജി; അടിയന്തരമായി വാദം കേള്ക്കണമെന്ന കേരളത്തിന്റെ ആവശ്യം അംഗീകരിച്ച് സുപ്രിംകോടതി
ന്യൂഡല്ഹി: നവകേരള സര്വ്വേയുമായി ബന്ധപ്പെട്ട കേരള സര്ക്കാരിന്റെ ഹരജിയില് അടിയന്തരമായി വാദം കേള്ക്കണമെന്ന കേരളത്തിന്റെ ആവശ്യം അംഗീകരിച്ച് സുപ്രിംകോടതി. കേസ് അടുത്ത ചൊവ്വാഴ്ച കോടതി പരിഗണിക്കും. ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചാണ് ഹരജിയില് വാദം കേള്ക്കുക. നവകേരള സര്വ്വേ റദ്ദാക്കിയ ഹൈക്കോടതി വിധി അടിയന്തരമായി സ്റ്റേ ചെയ്യണമെന്നാണ് കേരളത്തിന്റെ ആവശ്യം. ഹൈക്കോടതി വിധി അടിയന്തരമായി സ്റ്റേ ചെയ്യണമെന്നാണ് കേരളത്തിന്റെ പ്രധാന ആവശ്യം. വികസന നേട്ടങ്ങളെക്കുറിച്ചുള്ള ജനങ്ങളുടെ അഭിപ്രായം തേടുന്നത് ഭരണഘടനാപരമായ അവകാശമാണെന്നും ഹൈക്കോടതിയുടെ ഇടപെടല് ഇതിന് തടസ്സമാണെന്നുമാണ് സംസ്ഥാന സര്ക്കാരിന്റെ വാദം.
മന്ത്രിസഭയുടെ അനുമതിയോടെയാണ് സര്വ്വേ നടത്തുന്നതെന്നും ബജറ്റില് വകയിരുത്തിയ പണമാണ് ഇതിനായി ഉപയോഗിക്കുന്നതെന്നുമാണ് സംസ്ഥാനം കോടതിയെ അറിയിക്കുക. കഴിഞ്ഞ പത്ത് വര്ഷത്തെ സര്ക്കാരിന്റെ വികസന നേട്ടങ്ങള് ജനങ്ങള് എങ്ങനെ വിലയിരുത്തുന്നു എന്ന് അറിയുന്നതിനായിട്ടായിരുന്നു സര്ക്കാര് നവകേരള സര്വ്വേ പ്രഖ്യാപിച്ചത്. 20 കോടി രൂപ ഇതിനായി വകയിരുത്തി. ഇതിനെതിരേയാണ് കെഎസ്യു നേതാക്കളായ അലോഷ്യസ് സേവ്യര്, മുബാസ് എന്നിവര് ഹൈകോടതിയില് ഹരജി നല്കിയത്. സിപിഎമ്മിന്റെ രാഷ്ട്രീയ പ്രചാരണത്തിന് വേണ്ടി പൊതുഖജനാവിലെ പണം ഉപയോഗിക്കുന്നു എന്നാണ് ഹരജിയില് ചൂണ്ടികാട്ടിയത്.
സര്ക്കാരിന്റെ ഈ നടപടി നിയമങ്ങള്ക്ക് അനുസൃതമല്ലെന്ന് ചൂണ്ടിക്കാട്ടി ഹൈക്കോടതി നേരത്തെ സര്വ്വേ നടപടികള് റദ്ദാക്കിയിരുന്നു. ഹൈക്കോടതിയുടെ ഈ വിധിക്കെതിരേയാണ് കേരള സര്ക്കാര് സുപ്രിംകോടതിയെ സമീപിച്ചത്. പദ്ധതിക്ക് പണം വകയിരുത്തിയതുമായി ബന്ധപ്പെട്ട രേഖകള് കോടതി സര്ക്കാരിനോട് ആവശ്യപ്പെട്ടിരുന്നു, തുടര്ന്നാണ് സര്വേ റദ്ദ് ചെയ്യാനുള്ള നടപടിയിലേക്ക് ഹൈകോടതി കടന്നത്. നവകേരള സര്വേ പദ്ധതിക്ക് ബജറ്റ് അലോക്കേഷനോ ധനകാര്യ അനുമതിയോ ഇല്ലെന്ന് കോടതി നീരീക്ഷിച്ചു. സര്വ്വേ നിയമവിരുദ്ധമെന്നും ചീഫ് ജസ്റ്റിസ് ബെഞ്ച് വ്യക്തമാക്കിയിരുന്നു.