മൂന്നാറില് ഉയര്ന്ന അള്ട്രാവയലറ്റ് സൂചിക; ഓറഞ്ച് അലേര്ട്ട് പ്രഖ്യാപിച്ചു
തിരുവനന്തപുരം: സംസ്ഥാനത്ത് ഏറ്റവും ഉയര്ന്ന അള്ട്രാവയലറ്റ് (യുവി) സൂചിക എട്ട് ആയി മൂന്നാറില് രേഖപ്പെടുത്തി. ഇതിനെ തുടര്ന്ന് സംസ്ഥാന ദുരന്ത നിവാരണ അതോറിറ്റി ഇവിടെ ഓറഞ്ച് അലേര്ട്ട് പ്രഖ്യാപിച്ചു. കഴിഞ്ഞ 24 മണിക്കൂറിലെ യുവി ഇന്ഡക്സ് കണക്കുകള് പ്രകാരം കോട്ടാരക്കര, കോന്നി, ചെങ്ങന്നൂര് , ചങ്ങനാശേരി, ഒല്ലൂര്, തൃത്താല, പൊന്നാനി, മാനന്തവാടി എന്നിവടങ്ങളില് യെല്ലോ അലേര്ട്ട് പ്രഖ്യാപിച്ചിട്ടുണ്ട്. നിലവിലെ സാഹചര്യത്തില് പൊതുജനങ്ങള് കര്ശനമായ സുരക്ഷാ മുന്കരുതലുകള് പാലിക്കണമെന്ന് അധികൃതര് അറിയിച്ചു.
തുടര്ച്ചയായി കൂടുതല് സമയം അള്ട്രാവയലറ്റ് രശ്മികള് ശരീരത്തില് ഏല്ക്കുന്നത് സൂര്യാതാപം, ത്വക്ക് രോഗങ്ങള്, നേത്രരോഗങ്ങള് എന്നിവയ്ക്കും മറ്റ് ആരോഗ്യ പ്രശ്നങ്ങള്ക്കും കാരണമാകാമെന്ന് മുന്നറിയിപ്പുണ്ട്. അള്ട്രാവയലറ്റ് സൂചിക ആരു മുതല് ഏഴു വരെ എത്തിയാല് യെല്ലോ അലേര്ട്ടും എട്ടു മുതല് പത്ത് വരെ എത്തിയാല് ഓറഞ്ച് അലേര്ട്ടും 11നു മുകളില് എത്തിയാല് റെഡ് അലേര്ട്ടുമാണ് പ്രഖ്യാപിക്കുക.
പൊതുജനങ്ങള്ക്ക് നിര്ദേശങ്ങള്:
പകന് പത്ത് മുതല് മൂന്നു വരെ അള്ട്രാവയലറ്റ് സൂചിക ഉയര്ന്നതായിരിക്കും. ഈ സമയങ്ങളില് നേരിട്ട് സൂര്യപ്രകാശം ഏല്ക്കുന്നത് പരമാവധി ഒഴിവാക്കുക.
പുറം ജോലികളില് ഏര്പ്പെടുന്നവര്, മല്സ്യത്തെഴിലാളികള്, ജലഗതാഗത മേഖലയിലെ തൊഴിലാളികള്, ബൈക്ക് യാത്രക്കാര്, വിനോദസഞ്ചാരികള് എന്നിവരും ചര്മനേത്ര രോഗങ്ങളുള്ളവരും പ്രത്യേകം ജാഗ്രത പാലിക്കുക.
പകല് സമയത്ത് പുറത്തിറങ്ങുമ്പോള് തൊപ്പി, കുട, സണ്ഗ്ലാസ് എന്നിവ ഉപയോഗിക്കുകയും ശരീരം മുഴുവന് മറയ്ക്കുന്ന കോട്ടണ് വസ്ത്രങ്ങള് ധരിക്കുകയും ചെയ്യുന്നത് ഉചിതമാണ്.
യാത്രകളില് ഇടവേളകളില് തണലില് വിശ്രമിക്കാന് ശ്രമിക്കുക.
മലമ്പ്രദേശങ്ങളിലും ഉഷ്ണമേഖല പ്രദേശങ്ങളിലും സാധാരണയായി യുവി സൂചിക ഉയര്ന്നതായിരിക്കും. ഈ പ്രദേശങ്ങളില് താമസിക്കുന്നവര് കൂടുതല് ശ്രദ്ധ പുലര്ത്തണം.