ഗുണനിലവാരമില്ല; സംസ്ഥാനത്ത് ഒരു കഫ്സിറപ്പും മറ്റൊരു കമ്പനിയുടെ എല്ലാ മരുന്നുകളും നിരോധിച്ചു
തമിഴ്നാട് കാഞ്ചീപുരത്ത് പ്രവര്ത്തിക്കുന്ന ശ്രീശന് ഫാര്മസ്യൂട്ടിക്കല്സിന്റെ മരുന്നുകള് ഉപയോഗിക്കരുതെന്നും ആരോഗ്യമന്ത്രി വീണാ ജോര്ജ് അറിയിച്ചു
തിരുവനന്തപുരം: ഗുണനിലവാരമില്ലാത്തതിനെ തുടര്ന്ന് രണ്ട് ഫാര്മസ്യൂട്ടിക്കല് കമ്പനികളുടെ മരുന്നുകളുടെ വിതരണവും വില്പനയും സംസ്ഥാനത്ത് അടിയന്തരമായി നിര്ത്തിവെച്ചതായി ആരോഗ്യ വകുപ്പ് മന്ത്രി വീണാ ജോര്ജ് അറിയിച്ചു. വിവിധ സംസ്ഥാനങ്ങളില് കഫ് സിറപ്പ് കഴിച്ച് കുട്ടികള് മരിച്ച സാഹചര്യത്തിലാണ് മന്ത്രിയുടെ അറിയിപ്പ്.
തമിഴ്നാട് കാഞ്ചീപുരത്ത് പ്രവര്ത്തിക്കുന്ന ശ്രീശന് ഫാര്മസ്യൂട്ടിക്കല്സിന്റെ എല്ലാ മരുന്നുകളുടെയും വിതരണം കേരളത്തിലുടനീളം നിര്ത്തിവെക്കാന് മന്ത്രി നിര്ദ്ദേശം നല്കി. ശ്രീശന് ഫാര്മസ്യൂട്ടിക്കല്സിന്റെ ലൈസന്സ് റദ്ദാക്കാന് തമിഴ്നാട് ഡ്രഗ്സ് കണ്ട്രോളര് നടപടി ആരംഭിച്ച സാഹചര്യത്തിലാണ് തീരുമാനം.
കൂടാതെ, ഗുജറാത്തിലെ റെഡ്നെക്സ് ഫാര്മസ്യൂട്ടിക്കല്സ് പ്രൈവറ്റ് ലിമിറ്റഡ് അഹമ്മദാബാദ് നിര്മ്മിച്ച റെസ്പിഫ്രഷ് ടി ആര് എന്ന ചുമ സിറപ്പ് ഗുണനിലവാരമില്ലെന്ന് ഗുജറാത്ത് ഡ്രഗ്സ് കണ്ട്രോളര് അറിയിച്ചതിനെ തുടര്ന്ന് ഇതിന്റെ വിതരണവും വില്പനയും ഡ്രഗ്സ് കണ്ട്രോള് വകുപ്പ് അടിയന്തരമായി നിര്ത്തിവെപ്പിച്ചു.
സംസ്ഥാനത്തെ അഞ്ച് വിതരണക്കാര്ക്കാണ് മരുന്ന് വിതരണം നിര്ത്തിവയ്ക്കാന് നിര്ദേശം നല്കിയിട്ടുള്ളത്. ഈ മരുന്ന് കൈവശമുള്ളവര് ഉപയോഗിക്കരുതെന്നും, സര്ക്കാര് ആശുപത്രികള് വഴി ഈ മരുന്ന് വിതരണം ചെയ്യുന്നില്ലെന്നും മന്ത്രി വ്യക്തമാക്കി. വിലക്ക് ലംഘിച്ച് മരുന്ന് വില്ക്കുന്നവര്ക്കെതിരെയും, ഡോക്ടറുടെ കുറിപ്പടിയില്ലാതെ 12 വയസിനുതാഴെയുള്ള കുട്ടികള്ക്ക് മരുന്ന് നല്കുന്ന സ്ഥാപനങ്ങള്ക്കെതിരെ കര്ശന നടപടി സ്വീകരിക്കണമെന്നും മന്ത്രി ആരോഗ്യവകുപ്പിന് നിര്ദേശം നല്കി.
രാജസ്ഥാനിലും മധ്യപ്രദേശിലുമായി കഫ്സിറപ്പ് കഴിച്ച് കുട്ടികള് മരിച്ചതിനെതുടര്ന്നാണ് സര്ക്കാര് ജാഗ്രത കര്ശനമാക്കുന്നത്. മായം കലര്ന്ന കഫ്സിറപ്പായ കോള്ഡ്റിഫിന് അഞ്ച് സംസ്ഥാനങ്ങള് നേരത്തെ നിരോധനമേര്പ്പെടുത്തിയിരുന്നു. സംസ്ഥാനത്ത് ഈ കഫ്സിറപ്പിന്റെ വിതരണവും വില്പ്പനയും നിര്ത്തിവയ്ക്കുകയും ചെയ്തിരുന്നു.