മലപ്പുറം: നിപ ബാധിത പ്രദേശങ്ങള് സന്ദര്ശിക്കാനും പ്രതിരോധ പ്രവര്ത്തനങ്ങള് ഏകോപിപ്പിക്കാനുമായി കേന്ദ്ര സംഘം ജില്ലയിലെത്തി. സാഹച്യങ്ങള് പഠിച്ച് കേന്ദ്രത്തിന് റിപ്പോര്ട്ട് നല്കുന്നതിനും 0പ്രതിരോധ പ്രവര്ത്തനങ്ങളില് സംസ്ഥാനത്തെ സഹായിക്കുന്നതിനുമായി കേന്ദ്ര ആരോഗ്യ കുടുംബ ക്ഷേമ മന്ത്രാലയം നിയോഗിച്ച നാഷണല് ജോയിന്റ് ഔട്ട്ബ്രേക്ക് റെസ്പോണ്സ് ടീമാണ് ജില്ലയിലെത്തിയത്. നാഷണല് സെന്റര് ഫോര് ഡിസീസ് കണ്ട്രോളിലെ (എന്സിഡിസി) ജോയിന്റ് ഡയറക്ടറും പൊതുജനാരോഗ്യ സ്പെഷ്യലിസ്റ്റുമായ ഡോ. പ്രണായ് വര്മയുടെ നേതൃത്വത്തിലുള്ള 10 പേരാണ് ജില്ലയിലെത്തിയത്. ഐസിഎംആര്- നാഷനല് ഇന്സ്റ്റിറ്റ്യൂട്ട് ഓഫ് വൈറോജി പൂനെയില് നിന്നുള്ള ശാസ്ത്രജ്ഞര്, വന്യജീവി സ്പെഷ്യലിസ്റ്റ്, വെറ്ററിനറി കണ്സള്ട്ടന്റ്, മൃഗസംരക്ഷ വകുപ്പിലെ വിദഗ്ധര് തുടങ്ങിയവരും സംഘത്തിലുണ്ട്. സംഘം ജില്ലാ മെഡിക്കല് ഓഫീസര് ഡോ. ആര് രേണുകയുമായി കൂടിക്കാഴ്ച നടത്തി. വവ്വാലുകളുടെ നിരീക്ഷണത്തിനും സര്വ്വെക്കുമായി ഡോ. ഇ ദിലീപ് പാട്ടീലിന്റെ നേതൃത്വത്തിലുള്ള എട്ട് പേരടങ്ങുന്ന മറ്റൊരു എന്ഐവി സംഘവും ഉടന് ജില്ലയിലെത്തും. നിലവില് പാലക്കാടാണ് ഈ സംഘമുള്ളത്.