മനുഷ്യനെ ചന്ദ്രന്റെ ഭ്രമണപഥത്തിലേക്ക് എത്തിക്കാനുള്ള നാസയുടെ നിര്ണ്ണായക ദൗത്യം ആര്ട്ടെമിസ് 2 ഏപ്രില് ഒന്നിന്
ന്യൂഡല്ഹി: 1972ന് ശേഷം ആദ്യമായി മനുഷ്യനെ ചന്ദ്രന്റെ ഭ്രമണപഥത്തിലേക്ക് എത്തിക്കാനുള്ള നാസയുടെ നിര്ണ്ണായക ദൗത്യം ആര്ട്ടെമിസ് 2 ഏപ്രില് ഒന്നിന് . അമേരിക്കന് ബഹിരാകാശ ഏജന്സിയുടെ അത്യാധുനിക റോക്കറ്റായ സ്പേസ് ലോഞ്ച് സിസ്റ്റവും ഓറിയോണ് പേടകവും സംയുക്തമായി നടത്തുന്ന ആദ്യത്തെ മനുഷ്യ ദൗത്യമാണിത്.ചന്ദ്രനെ വലംവെച്ച് സുരക്ഷിതമായി ഭൂമിയില് തിരിച്ചെത്തുകയാണ് ദൗത്യത്തിന്റെ ലക്ഷ്യം.
ഭാവിയില് മനുഷ്യനെ ചന്ദ്രോപരിതലത്തില് ഇറക്കാനുള്ള ആര്ട്ടെമിസ് പ്രോഗ്രാമിന്റെ സുപ്രധാന പരീക്ഷണമായാണ് ഇതിനെ കണക്കാക്കുന്നത്. ഓറിയോണ് പേടകത്തിലെ ജീവന്രക്ഷാ സംവിധാനങ്ങള് ബഹിരാകാശ യാത്രികര്ക്ക് എത്രത്തോളം അനുയോജ്യമാണെന്ന് ഈ ദൗത്യം തെളിയിക്കും. നാല് ബഹിരാകാശ യാത്രികരാണ് യാത്രയില് പങ്കാളികളാകുക.
മാര്ച്ച് 19-ഓടെ റോക്കറ്റ് വിക്ഷേപണ തറയിലേക്ക് മാറ്റുമെന്നാണ് പ്രതീക്ഷിക്കുന്നത്. വിക്ഷേപണത്തിന് മുന്നോടിയായുള്ള കൗണ്ട്ഡൗണ് സിമുലേഷനും ഇന്ധനം നിറച്ചുള്ള പരീക്ഷണങ്ങളും വരും ദിവസങ്ങളില് നടക്കും.ആര്ട്ടെമിസ് 3 ഉള്പ്പെടെയുള്ള വരാനിരിക്കുന്ന ദൗത്യങ്ങളുടെ വിജയത്തിന് ഈ പരീക്ഷണം അത്യന്താപേക്ഷിതമാണെന്ന് നാസ അറിയിച്ചു.
അപ്പോളോ ദൗത്യങ്ങള്ക്ക് ശേഷം ചന്ദ്രനിലേക്കുള്ള മനുഷ്യന്റെ മടങ്ങിപ്പോക്കിന് ആര്ട്ടെമിസ് 2 അടിത്തറ പാകും. ശാസ്ത്രീയ കണ്ടെത്തലുകള്ക്കും സാമ്പത്തിക നേട്ടങ്ങള്ക്കും പുറമെ, ഭാവിയില് ചൊവ്വയിലേക്കുള്ള മനുഷ്യന്റെ യാത്രകള്ക്കുള്ള ഊര്ജ്ജം പകരാനും ഈ ചന്ദ്ര ദൗത്യങ്ങള് സഹായിക്കും.