മ്യാന്മറില് 8,665 പേര്ക്ക് രാഷ്ട്രീയ പൊതുമാപ്പ്; ആയിരങ്ങള് ജയില് മോചിതരായി
യംഗോണ്: ഡിസംബര് 28ലെ പൊതുതിരഞ്ഞെടുപ്പിനു മുന്നോടിയായി മ്യാന്മര് സൈനിക ഭരണകൂടം 8,665 രാഷ്ട്രീയ തടവുകാര്ക്ക് പൊതുമാപ്പ് പ്രഖ്യാപിച്ചു. രാജ്യത്തെ വിവിധ ജയിലുകളില് നിന്ന് വലിയ തോതില് തടവുകാര് പുറത്തെത്തിത്തുടങ്ങിയതായാണ് റിപോര്ട്ട്. യംഗോണിലെ പ്രശസ്തമായ ഇന്സെയ്ന് ജയിലില് നിന്നും രാവിലെ 11.30ഓടെ തടവുകാരെ പുറത്തുവിട്ടു. എട്ടു ബസുകളിലായിരുന്നു തടവുകാരെ പുറത്തെത്തിച്ചത്. രാവിലെ മുതല് കാത്തുനിന്നിരുന്ന ബന്ധുക്കള് ആഹ്ളാദത്തോടെ സ്വീകരിക്കുന്ന ദൃശ്യങ്ങള് സോഷ്യല് മീഡിയകളില് പ്രചരിച്ചു. പൊതുമാപ്പ് വ്യവസ്ഥ പ്രകാരം ഇന്സൈറ്റ്മെന്റ് നിയമത്തിന്റെ കീഴില് ശിക്ഷിക്കപ്പെട്ട 3,085 തടവുകാര്ക്ക് പൂര്ണ അമ്നസ്റ്റി ലഭിച്ചു. 724 പേര്ക്ക് നിബന്ധനാപരമായ മോചനവും അനുവദിച്ചു. കൂടാതെ ഒളിവിലായിരുന്നവരും വിചാരണയില് കഴിയുന്നവരും ഉള്പ്പെടെ 5,580 പേരുടെ കേസുകളും സര്ക്കാര് തള്ളി. ഇവര്ക്ക് പൊതുതിരഞ്ഞെടുപ്പില് വോട്ട് ചെയ്യാനുള്ള അവസരം നല്കുക എന്നതാണെന്ന് ഭരണകൂടം വ്യക്തമാക്കി.
അതേസമയം രാജ്യത്ത് ഇപ്പോഴും 22,708 പേര് രാഷ്ട്രീയ തടവില് തുടരുന്നു. 2021ലെ സൈനിക അട്ടിമറിയില് പുറത്താക്കപ്പെട്ട നാഷണല് ലീഗ് ഫോര് ഡെമോക്രസി (എന്എല്ഡി) നേതാവും മുന് സ്റ്റേറ്റ് കൗണ്സിലറുമായ ആങ് സാന് സൂചി 27 വര്ഷത്തെ തടവുശിക്ഷ അനുഭവിച്ചു കൊണ്ടിരിക്കുകയാണ്. മോചിതരിലുണ്ടായവര് എന്എല്ഡി കേന്ദ്ര വിവരം സമിതി അംഗം ക്യി ടോയും 2021ല് അറസ്റ്റിലായ സ്വതന്ത്ര പത്രപ്രവര്ത്തകന് സോ ലിന് തൂത്ത് എന്നിവരും ഉള്പ്പെടുന്നു.
നിയമത്തിന്റെ പശ്ചാത്തലം
മ്യാന്മര് ഇന്സൈറ്റ്മെന്റ് നിയമം പീനല് കോഡ് സെക്ഷന് 505(എ) എന്ന പേരിലാണ് അറിയപ്പെടുന്നത്. സര്ക്കാര്സൈനിക വിഭാഗങ്ങളെ വിമര്ശിക്കുന്നവര്, പൊതുപ്രവര്ത്തകര്, പത്രപ്രവര്ത്തകര്, പ്രതിപക്ഷ നേതാക്കള് തുടങ്ങി വ്യത്യസ്ത വിഭാഗങ്ങളെ ജയില്ശിക്ഷയ്ക്ക് വിധേയരാക്കാന് ഭരണകൂടം വ്യാപകമായി ഉപയോഗിച്ച നിയമമാണിത്. പൊതുജനങ്ങളില് അശാന്തി സൃഷ്ടിക്കുന്ന തരത്തിലുള്ള പ്രസ്താവനകള്, പ്രസംഗങ്ങള്, സോഷ്യല് മീഡിയ പോസ്റ്റുകള് എന്നിവയ്ക്കെതിരേ ഈ നിയമം പ്രയോഗിക്കപ്പെടുന്നു. മൂന്നുവര്ഷം വരെ തടവുശിക്ഷ ലഭിക്കാവുന്ന വകുപ്പാണ് ഇത്. 2021ലെ അട്ടിമറിക്കു ശേഷം ആയിരക്കണക്കിന് പേരെ ഈ നിയമപ്രകാരം അറസ്റ്റ് ചെയ്തു.