മലപ്പുറം: കൊണ്ടോട്ടിയില് പൊട്ടിവീണ വൈദ്യുത കമ്പിയില് നിന്ന് ഷോക്കേറ്റ് ഗൃഹനാഥന് മരിച്ചു. നീരാട് മാങ്ങാട്ട് മുഹമ്മദ് ഷാ ആണ് മരിച്ചത്. ഇന്ന് ഉച്ചയ്ക്ക് ശേഷമാണ് സംഭവം. വീട്ടുവളപ്പിലെ തോട്ടത്തില് പണിയെടുക്കുന്നതിനിടെയാണ് പൊട്ടിവീണുകിടന്ന വൈദ്യുതക്കമ്പിയില് നിന്ന് മുഹമ്മദ് ഷായ്ക്ക് ഷോക്കേറ്റത് എന്നാണ് പ്രാഥമികവിവരം. അയല്വാസിയുടെ വീട്ടിലേക്ക് വലിച്ചിരുന്ന വൈദ്യുതക്കമ്പിയാണ് പൊട്ടിവീണത് എന്നാണ് വിവരം.
സ്ഥലത്ത് ബുധനാഴ്ച രാത്രി ഉണ്ടായ കനത്ത മഴയിലും കാറ്റിലുമാകാം വൈദ്യുതിക്കമ്പി പൊട്ടിവീണത് എന്നാണ് നാട്ടുകാര് പറയുന്നത്. സംഭവം ശ്രദ്ധയില്പെട്ട ഉടന്തന്നെ കെഎസ്ഇബിയില് പരാതി നല്കിയിരുന്നതായി സമീപവാസികള് പറയുന്നു. ഉച്ചയ്ക്ക് 12.30-ഓടെയാണ് മുഹമ്മദ് ഷാ തൊടിയിലേക്ക് ഇറങ്ങിയത്. ബഹളം കേട്ട് ഓടിക്കൂടിയ നാട്ടുകാര് മുഹമ്മദ് ഷായെ ഉടന്തന്നെ കൊണ്ടോട്ടി മേഴ്സി ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. പോസ്റ്റുമോര്ട്ടം നടപടികള്ക്കായി മൃതദേഹം മഞ്ചേരി മെഡിക്കല് കോളജ് ആശുപത്രിയില് സൂക്ഷിച്ചിരിക്കുകയാണ്.