കെഎസ്ആര്ടിസി ബസുകളും ടാങ്കര് ലോറിയും കൂട്ടിയിടിച്ച് അപകടം; ലോറി ഡ്രൈവര് മരിച്ചു
കൊല്ലം: കൊട്ടാരക്കര എംസി റോഡില് വയയ്ക്കലില് രണ്ട് കെഎസ്ആര്ടിസി ബസുകളും ടാങ്കര് ലോറിയും കൂട്ടിയിടിച്ചുണ്ടായ അപകടത്തില് ഒരാള് മരിച്ചു. ടാങ്കര് ലോറി ഡ്രൈവര് തൃശൂര് സ്വദേശി ഡോണ് ബോസ്കോയാണ് മരിച്ചത്. ഡോണ് ബോസ്കോയുടെ മൃതദേഹം നിലവില് കൊട്ടാരക്കര താലൂക്ക് ആശുപത്രിയിലേക്ക് മാറ്റി. അഗ്നിരക്ഷാ സേനയും പോലിസും എത്തിയതിനു പിന്നാലെ വാഹനങ്ങള് വെട്ടിപ്പൊളിച്ചാണ് ബസിന്റെ ഡ്രൈവറേയും ടാങ്കര് ലോറിയുടെ ഡ്രൈവറേയും പുറത്തെടുത്തത്.
ആയൂര്-കൊട്ടാരക്കര റോഡില് ഇന്ന് ഉച്ചയ്ക്ക് മൂന്നുമണിയോടെയാണ് അപകമുണ്ടായത്. കോട്ടയത്തേക്ക് പോവുകയായിരുന്ന ഫാസ്റ്റ് പാസഞ്ചര് ബസ് നിര്ത്തിയിട്ടിരുന്ന ഓര്ഡിനറി ബസിനെ ഓവര്ടേക്ക് ചെയ്യാന് ശ്രമിക്കവെയാണ് അപകടം. ഒട്ടേറെ പേര്ക്ക് പരിക്കേറ്റു. ബസ് എതിരേവന്ന ടാങ്കര് ലോറിയിലേക്ക് ഇടിച്ച് കയറുകയായിരുന്നു. നാട്ടുകാര് ഉടന് തന്നെ രക്ഷാപ്രവര്ത്തനം ആരംഭിച്ചു. ഒരേ ദിശയില് വന്ന കെഎസ്ആര്ടിസി ഫാസ്റ്റ് പാസഞ്ചര് ബസും ഓര്ഡിനറി ബസും എതിര്ദിശയില്വന്ന ടാങ്കര് ലോറിയുമാണ് അപകടത്തില്പെട്ടത്.