ആരോപണ വിധേയരായ വ്യക്തികള് സ്വയമേവ വിട്ടുനില്ക്കുന്നതാണ് ഉചിതം; സംസ്ഥാന സ്കൂള് ശാസ്ത്രോല്സവത്തിന്റെ ഉദ്ഘാടന വേദിയില് രാഹുല് മാങ്കൂട്ടത്തില് എംഎല്എ പങ്കെടുത്തതില് വിശദീകരണവുമായി മന്ത്രി വി ശിവന്കുട്ടി
തിരുവനന്തപുരം: പൊതുസമൂഹത്തിന് മുന്നില് നില്ക്കുമ്പോള് പാലിക്കേണ്ട ധാര്മികമായ ഉത്തരവാദിത്തവും മാന്യതയും ഓരോ വ്യക്തിയും സ്വയം പാലിക്കേണ്ടതുണ്ടെന്ന് മന്ത്രി വി ശിവന്കുട്ടി. സംസ്ഥാന സ്കൂള് ശാസ്ത്രോല്സവത്തിന്റെ ഉദ്ഘാടന വേദിയില് രാഹുല് മാങ്കൂട്ടത്തില് എംഎല്എ പങ്കെടുത്തതുമായി ബന്ധപ്പെട്ട് ഉയര്ന്നുവന്ന വിവാദങ്ങളിലാണ് മന്ത്രിയുടെ പ്രതികരണം. തന്റെ ഫെയ്സ്ബുക്ക് പേജിലൂടെയായിരുന്നു മന്ത്രിയുടെ വിശദീകരണം. രാഹുല് മാങ്കൂട്ടത്തിലിനെതിരായ ആരോപണങ്ങള് നിലവില് അന്വേഷണത്തിലാണ്. നിയമം അതിന്റെ വഴിക്ക് മുന്നോട്ട് പോകട്ടെ. എന്നാല്, പൊതുസമൂഹത്തില്, പ്രത്യേകിച്ചും കുട്ടികള്ക്ക് മാതൃകയാകേണ്ട വേദികളില്, ആരോപണ വിധേയരായ വ്യക്തികള് സ്വയമേവ വിട്ടുനില്ക്കുന്നതാണ് ഉചിതമായ നിലപാടെന്ന് മന്ത്രി പറഞ്ഞു.
ഫെയ്സ്ബുക്ക് പോസ്റ്റിന്റെ പൂര്ണരൂപം
സംസ്ഥാന സ്കൂള് ശാസ്ത്രോത്സവത്തിന്റെ ഉദ്ഘാടന വേദിയില് രാഹുല് മാങ്കൂട്ടത്തില് എംഎല്എ പങ്കെടുത്തതുമായി ബന്ധപ്പെട്ട് ഉയര്ന്നുവന്ന വിഷയത്തെ പൊതുവിദ്യാഭ്യാസ വകുപ്പ് ഗൗരവത്തോടെയാണ് കാണുന്നത്.
ലൈംഗികാരോപണം നേരിടുന്ന ഒരു വ്യക്തി, കുട്ടികളും രക്ഷിതാക്കളും അധ്യാപകരും ഉള്പ്പെടെ വലിയൊരു സമൂഹം പങ്കെടുക്കുന്ന ഒരു പൊതുപരിപാടിയുടെ, പ്രത്യേകിച്ച് ശാസ്ത്രരംഗത്തെ വിദ്യാര്ത്ഥികളുടെ മുന്നേറ്റം ലക്ഷ്യമിടുന്ന ഒരു പരിപാടിയുടെ, വേദിയില് എത്തിയത് ഉണ്ടാക്കുന്ന അതൃപ്തിയും ആശങ്കകളും മനസ്സിലാക്കുന്നു. ഇത്തരം വിവാദങ്ങള്ക്ക് ഇടവരുത്തുന്നത് പൊതു വിദ്യാഭ്യാസ വകുപ്പിന്റെ ഉന്നതമായ ലക്ഷ്യങ്ങള്ക്ക് യോജിച്ചതല്ല.
ഒരു ജനപ്രതിനിധിയെ നിയമപരമായി വേദിയില് നിന്ന് മാറ്റി നിര്ത്താന് കഴിയില്ലെങ്കിലും, പൊതുസമൂഹത്തിന് മുന്നില് നില്ക്കുമ്പോള് പാലിക്കേണ്ട ധാര്മികമായ ഉത്തരവാദിത്തവും മാന്യതയും ഓരോ വ്യക്തിയും സ്വയം പാലിക്കേണ്ടതുണ്ട്. രാഹുല് മാങ്കൂട്ടത്തിലിനെതിരായ ആരോപണങ്ങള് നിലവില് അന്വേഷണത്തിലാണ്. നിയമം അതിന്റെ വഴിക്ക് മുന്നോട്ട് പോകട്ടെ. എന്നാല്, പൊതുസമൂഹത്തില്, പ്രത്യേകിച്ചും കുട്ടികള്ക്ക് മാതൃകയാകേണ്ട വേദികളില്, ആരോപണ വിധേയരായ വ്യക്തികള് സ്വയമേവ വിട്ടുനില്ക്കുന്നതാണ് ഉചിതമായ നിലപാടെന്ന് ഈ സര്ക്കാര് വിശ്വസിക്കുന്നു.
ഭാവിയില് പൊതുവിദ്യാഭ്യാസ വകുപ്പ് സംഘടിപ്പിക്കുന്ന ഇത്തരം പരിപാടികളില്, വിദ്യാര്ത്ഥികളുടെയും പൊതുസമൂഹത്തിന്റെയും ആത്മവിശ്വാസത്തെയും ധാര്മിക ചിന്തകളെയും പ്രതികൂലമായി ബാധിക്കുന്ന ഒരു സാഹചര്യവും ഉണ്ടാകില്ലെന്ന് ഉറപ്പുവരുത്താനുള്ള നിര്ദേശം നല്കും. പൊതുവിദ്യാഭ്യാസ മേഖലയുടെ അന്തസ്സ് ഉയര്ത്തിപ്പിടിക്കുന്നതില് ഈ സര്ക്കാര് എന്നും പ്രതിജ്ഞാബദ്ധമായിരിക്കും.