പശുവിന് പാലിനേക്കാള് ഗുണം മൂന്നിരട്ടി; സൂപര് ഫുഡ് ആവാനൊരുങ്ങി പാറ്റപ്പാല്!
ന്യൂഡല്ഹി: സൂപ്പര്ഫുഡ് എന്ന പദം സാധാരണയായി ഫിറ്റ്നസ്, വെല്നസ് മേഖലകളില് ഉപയോഗിക്കാറുണ്ട്, പലപ്പോഴും ഇലക്കറികള്, ഫലങ്ങള്, നട്സ് തുടങ്ങിയ പോഷകസമൃദ്ധമായ ഭക്ഷണങ്ങളെയാണ് ഇത് സൂചിപ്പിക്കുന്നത്. എന്നാല് സൂപ്പര്ഫുഡ് വിഭാഗത്തില് ഒരു പുതിയ ഇനം കൂടി ഉണ്ടാകുമെന്നതാണ് ഇപ്പോഴത്തെ കണ്ടെത്തല്. പാറ്റയുടെ പാലാണ് ഈ പുതിയ ഇനം.
ഡിപ്ലോപ്റ്റെറ പങ്ക്ടാറ്റ എന്ന ഇനത്തില്പ്പെട്ട പാറ്റയുടെ പാല് പശുവിന് പാലിനേക്കാള് മൂന്നിരട്ടി പോഷകസമൃദ്ധമാണെന്നാണ് ശാസ്ത്രജ്ഞര് കണ്ടെത്തിയിരിക്കുന്നത്. പ്രോട്ടീനുകള്, കൊഴുപ്പ്, പഞ്ചസാര എന്നിവയാല് സമ്പന്നമായ ഈ പാല് ഏറ്റവും പോഷക സമൃദ്ധമായ പദാര്ഥങ്ങളില് ഒന്നാണെന്ന് ഗവേഷകര് എടുത്തുകാണിക്കുന്നു. വിലയേറിയ പോഷകങ്ങള് നല്കാനും ഭാവിയിലെ ഭക്ഷ്യ നവീകരണങ്ങളില് ഒരു പങ്കു വഹിക്കാനുമുള്ള കഴിവിനായി പാറ്റപ്പാലിനെ ഇപ്പോള് പഠനവിധേയമാക്കിയിട്ടുണ്ട്.
ദി ഇന്ഡിപെന്ഡന്റ് റിപോര്ട്ട് ചെയ്യുന്നതനുസരിച്ച് , പാറ്റകളുടെ കുഞ്ഞുങ്ങള്ക്ക് ഭക്ഷണം നല്കുമ്പോള് അവയുടെ വയറ്റില് മഞ്ഞകലര്ന്ന പദാര്ഥം രൂപപ്പെടുന്നതായി അവര് കണ്ടെത്തി.സസ്തനികളുടെ പാലില് ഏറ്റവും കലോറി കൂടുതലായിരുന്ന എരുമപ്പാലിന്റെ മൂന്നിരട്ടി കലോറി ഇതില് അടങ്ങിയിട്ടുണ്ടെന്ന് വെളിപ്പെടുത്തുന്നതിനൊപ്പം, കോശ വളര്ച്ചയ്ക്കുതകുന്ന ഒരു ടണ് പ്രോട്ടീനുകള്, അമിനോ ആസിഡുകള്, ആരോഗ്യകരമായ പഞ്ചസാര എന്നിവ ഇതില് അടങ്ങിയിട്ടുണ്ടെന്ന് ഗവേഷകര് കണ്ടെത്തി.
എന്നിരുന്നാലും, പാറ്റയുടെ പാല് ഇതുവരെ മനുഷ്യ ഉപഭോഗത്തിന് ലഭ്യമാക്കിയിട്ടില്ല. ഇന്ഡിപെന്ഡന്റ് റിപോര്ട്ട് അനുസരിച്ച് ഇതിന്റെ ഏറ്റവും വലിയ തടസം ഉല്പാദനമാണ് എന്നാണ് ഗവേഷകര് പറയുന്നത്.