യുഎസില് മേയറായി ഇന്ത്യന് വംശജ
സാന് കാര്ലോസ് മേയറായി പ്രണിത വെങ്കിടേഷ് തിരഞ്ഞെടുക്കപ്പെട്ടു
കാലിഫോര്ണിയ: യുഎസിലെ കാലിഫോര്ണിയയിലുള്ള സാന് കാര്ലോസ് നഗരത്തിന്റെ മേയറായി ഇന്ത്യന് വംശജയായ പ്രണിത വെങ്കിടേഷ് തിരഞ്ഞെടുക്കപ്പെട്ടു. ഫിജിയില് ജനിച്ച ഇന്ത്യന് വംശജയായ അമേരിക്കന് കമ്മ്യൂണിറ്റി നേതാവാണ് പ്രണിത. ന്യൂയോര്ക്ക് മേയര് തിരഞ്ഞെടുപ്പില് ഇന്ത്യന് വംശജനായ സൊഹ്റാന് മംദാനി നേടിയ ചരിത്ര വിജയം ഏറെ ആഘോഷിക്കപ്പെട്ടിരുന്നു. ഇതിനു പിന്നാലെയാണ് ഇന്ത്യന് വംശജയായ പ്രണിയ വെങ്കിടേഷിന്റെ വിജയം. സിറ്റി കൗണ്സിലിന്റെ ഏകകണ്ഠമായ വോട്ടോടെ ഡിസംബര് എട്ടിനാണ് പ്രണിത നഗരത്തിന്റെ മേയറായി ചുമതലയേറ്റത്. നഗരത്തിലെ ഏറ്റവും പ്രായം കുറഞ്ഞ മേയര്മാരില് ഒരാളാണ് പ്രണിത.
മാതാപിതാക്കള് ഇന്ത്യക്കാരാണെങ്കിലും പ്രണിത ഫിജിയിലാണ് ജനിച്ചത്. അവിടെ നിന്ന് നാലാമത്തെ വയസില് അമേരിക്കയിലേക്ക് താമസം മാറിയ പ്രണിത കാലിഫോര്ണിയയിലാണ് വളര്ന്നത്. നോത്രെ ദാം ഡി നമൂര് യൂണിവേഴ്സിറ്റിയില്നിന്ന് ബാച്ചിലര് ബിരുദവും ശിശുവികസനത്തിലും ക്ലിനിക്കല് സൈക്കോളജിയിലും ബിരുദാനന്തര ബിരുദവും നേടിയിട്ടുണ്ട് പ്രണിത.
സാന് കാര്ലോസിലെ ഒരു ചെറുകിട ബിസിനസ് ഉടമ കൂടിയാണ് പ്രണിത. പൊതുസേവന രംഗത്ത് പ്രവേശിക്കുന്നതിനു മുന്പ് ഈസ്റ്റ് പോളോ ആള്ട്ടോയില് ചൈല്ഡ് സൈക്കോളജിസ്റ്റായും ജോലി ചെയ്തിട്ടുണ്ട്. അവിടെ അവര് മോണ്ടിസോറി പ്രീ സ്കൂള് നടത്തുന്നുണ്ട്. 2022ല് ഡെമോക്രാറ്റിക് പാര്ട്ടിയുടെ പിന്തുണയോടെയാണ് ആദ്യമായി സാന് കാര്ലോസ് സിറ്റി കൗണ്സിലിലേക്ക് തിരഞ്ഞെടുക്കപ്പെട്ടത്. നഗരത്തിന്റെ സാമ്പത്തിക വികസന ഉപദേശക കമ്മീഷനില് മൂന്നു വര്ഷം അവര് പ്രവര്ത്തിച്ചിട്ടുണ്ട്.
'സാന് കാര്ലോസിനായുള്ള എന്റെ പ്രവര്ത്തനങ്ങള് ആത്മാര്ത്ഥതയോടെ നിര്വഹിക്കും. പൊതുസുരക്ഷ, ശിശു സംരക്ഷണം, സാമ്പത്തിക സ്ഥിരത, അടിസ്ഥാന സൗകര്യങ്ങള്, താങ്ങാനാവുന്ന പാര്പ്പിടം എന്നിവയാണ് നാടിനായി വാഗ്ദാനം ചെയ്യുന്നത്.' വിജയത്തിനു ശേഷം പ്രാദേശിക വാര്ത്താ മാധ്യമത്തോട് സംസാരിക്കവെ പ്രണിത പറഞ്ഞു.