ശബരിമലയിലെ സ്വര്ണക്കൊള്ള; മുന് യുഡിഎഫ് ഭരണസമിതിക്കെതിരേയും വെളിപ്പെടുത്തല്
പത്തനംതിട്ട: ശബരിമലയിലെ സ്വര്ണക്കൊള്ള കേസില് മുന് യുഡിഎഫ് ഭരണസമിതിക്കെതിരേ വെളിപ്പെടുത്തല്. ശബരിമലയിലെ പഴയ കൊടിമരത്തിലുണ്ടായിരുന്ന 'വാജി വാഹനം' തന്ത്രിക്ക് കൈമാറിയത് ബോര്ഡിന്റെ തന്നെ നിലവിലുള്ള ഉത്തരവുകളും ചട്ടങ്ങളും ലംഘിച്ചാണെന്ന് വ്യക്തമാക്കുന്ന രേഖകളാണ് പുറത്തുവന്നത്.
പ്രയാര് ഗോപാലകൃഷ്ണന് ദേവസ്വം ബോര്ഡിന്റെ പ്രസിഡന്റായിരുന്ന കാലത്താണ് സംഭവം നടക്കുന്നത്. ബോര്ഡിന്റെ സ്വത്തായ ഇത്തരം അമൂല്യ വസ്തുക്കള് വ്യക്തികള്ക്ക് കൈമാറുന്നത് നിയമവിരുദ്ധമാണെന്നിരിക്കെയാണ് നടപടി.
2012-ല് പുറത്തിറങ്ങിയ ദേവസ്വം ബോര്ഡ് ഉത്തരവ് പ്രകാരം വാജി വാഹനം ബോര്ഡിന്റെ ആസ്തിയായാണ് കണക്കാക്കിയിരുന്നത്. എന്നാല്, 2017-ല് പുതിയ കൊടിമരം സ്ഥാപിച്ചപ്പോള് പഴയ കൊടിമരത്തിലുണ്ടായിരുന്ന സ്വര്ണം പൊതിഞ്ഞ ഈ ശില്പം തന്ത്രിക്ക് കൈമാറുകയായിരുന്നു.