ഗ്യാസ് സിലിണ്ടര് പൊട്ടിത്തെറിച്ചുണ്ടായ അപകടം; അഞ്ച് വീടുകള് കത്തിനശിച്ചു
വീട് നഷ്ടപ്പെട്ടവരെ പകല് വീട്ടിലേക്കു മാറ്റുമെന്ന് കളക്ടര്
കൊല്ലം: കൊല്ലത്ത് ഗ്യാസ് സിലിണ്ടര് പൊട്ടിത്തെറിച്ചുണ്ടായ അപകടത്തില് അഞ്ച് വീടുകള് കത്തി നശിച്ചു. കൊല്ലം തങ്കശ്ശേരി ആല്ത്തറമൂട്ടില് ഇന്നലെ രാത്രിയാണ് അപകടം. നാല് യൂണിറ്റ് ഫയര് ഫോഴ്സെത്തിയാണ് തീയണച്ചത്. അപകടത്തില് വീട് നഷ്ടപ്പെട്ടവരെ പകല് വീട്ടിലേക്കു മാറ്റുമെന്ന് ജില്ലാ കളക്ടര് അറിയിച്ചു. ഭക്ഷണവും വസ്ത്രങ്ങളും നല്കുമെന്നും നഷ്ടപ്പെട്ട രേഖകളുടെ കാര്യത്തില് ആശങ്ക വേണ്ടെന്നും കളക്ടര് എന് ദേവിദാസ് പറഞ്ഞു.
ആല്ത്തറമൂടിനു സമീപമുള്ള പുറമ്പോക്കില് നിര്മ്മിച്ചിരുന്ന വീടുകള്ക്കാണ് തീപിടിച്ചത്. ആള്താമസമില്ലാത്ത ഒരു വീടിനായിരുന്നു ആദ്യം തീപിടിച്ചത്. തുടര്ന്ന് അടുത്തുള്ള വീടുകളിലേക്കും തീപടരുകയായിരുന്നു. ഗ്യാസ് സിലണ്ടര് പൊട്ടിത്തെറിച്ചാണ് അപകടമുണ്ടായതെന്നാണ് പ്രാഥമിക നിഗമനം. തകര ഷീറ്റുകൊണ്ട് മറച്ച വീടുകളാണ് അഗ്നിക്കിരയായത്. അടുത്തടുത്ത് നിന്നിരുന്ന വീടുകളായതിനാലാണ് ഇത്ര വേഗത്തില് തീപടര്ന്നത്. തീപിടരുന്നത് ശ്രദ്ധയില്പ്പെട്ടതോടെ വീട്ടുകാര് ഓടി രക്ഷപ്പെടുകയായിരുന്നു. അതിനാല് പരിക്കുകളില്ലാതെ ആളുകള് രക്ഷപ്പെട്ടു.