കോട്ടയം: ഇലവീഴാപൂഞ്ചിറ മലനിരകളില് വീണ്ടും തീപ്പിടിത്തം. നിയന്ത്രണവിധേയമാക്കിയ തീ രാത്രിയോടെ വീണ്ടും പടര്ന്നു. സ്ഥിതിഗതികള് നിരീക്ഷിക്കുന്നതിനും കൂടുതല് അപകടങ്ങള് ഒഴിവാക്കുന്നതിനുമായി അഗ്നിരക്ഷാസേനയുടെ ഒരു യൂണിറ്റ് പ്രദേശത്ത് തുടരുകയാണ്. ഇന്നലെ ഉച്ചയോടെയാണ് മലനിരകളില് തീ പടര്ന്നുപിടിച്ചത്. വിവരം ലഭിച്ചതോടെ ഈരാറ്റുപേട്ടയില് നിന്നുള്ള അഗ്നിരക്ഷാസേനയുടെ രണ്ടു വാഹനങ്ങള് ഉടന് സ്ഥലത്തെത്തി. ദീര്ഘനേരത്തെ പരിശ്രമത്തിനൊടുവില് വൈകുന്നേരത്തോടെ തീ നിയന്ത്രണവിധേയമാക്കിയെങ്കിലും രാത്രിയോടെ വീണ്ടും തീ ആളിപ്പടരുകയായിരുന്നു.
ക്രിസ്മസ് ദിനമായതിനാല് ഇലവീഴാപൂഞ്ചിറയില് വിനോദസഞ്ചാരികളുടെ വലിയ തിരക്കുണ്ടായിരുന്നു. വിനോദസഞ്ചാരികളുടെ ഭാഗത്തുനിന്നുള്ള അശ്രദ്ധയാണ് തീപ്പിടിത്തത്തിന് കാരണമാകാന് സാധ്യതയെന്നതാണ് പ്രാഥമിക നിഗമനം.