മംഗളൂരു: കോണ്ഗ്രസ് എംഎല്എയുടെ 64 കോടിയുടെ സ്വത്ത് ഇഡി കണ്ടുകെട്ടി. ഉത്തര കന്നട ജില്ലയിലെ കാര്വാര് മണ്ഡലം കോണ്ഗ്രസ് എംഎല്എ സതീഷ് കൃഷ്ണ സെയ്ലി(59)ന്റെ 64 കോടി രൂപയുടെ സ്വത്തുക്കള് കണ്ടുകെട്ടിയതായി എന്ഫോഴ്സ്മെന്റ് ഡയറക്ടറേറ്റ്(ഇഡി)അറിയിച്ചു. ഇരുമ്പയിര് കയറ്റുമതിയുമായി ബന്ധപ്പെട്ട കള്ളപ്പണം വെളുപ്പിക്കല് അന്വേഷണത്തിന്റെ ഭാഗമായാണ് നടപടി. ഗോവ ആസ്ഥാനമായുള്ള ശ്രീ മല്ലികാര്ജുന് ഷിപ്പിങ് പ്രൈവറ്റ് ലിമിറ്റഡ്(എസ്എംഎസ്പിഎല്)എന്ന കമ്പനിയിലൂടെ സെയിലിന്റെ കൈവശമുള്ള ആസ്തികള് ഉള്പ്പെടുത്തി കള്ളപ്പണം വെളുപ്പിക്കല് തടയല് നിയമം(പിഎംഎല്എ)പ്രകാരമുള്ള ഒരു താല്ക്കാലിക ഉത്തരവ് പുറപ്പെടുവിച്ചതായി ഇഡി പ്രസ്താവനയില് പറഞ്ഞു. സെയ്ലിനെ സെപ്റ്റംബറില് ഫെഡറല് ഏജന്സി അറസ്റ്റു ചെയ്തിരുന്നു. പിന്നീട് ആരോഗ്യ പ്രശ്നങ്ങള് പരിഗണിച്ച് അദ്ദേഹത്തിന് ഇടക്കാല ജാമ്യം അനുവദിച്ചു.
ഗോവയിലെ മോര്മുഗാവോയിലെ ചിക്കാലിം വില്ലേജിലെ 12,500 ചതുരശ്ര മീറ്റര് ഭൂമി, സൗത്ത് ഗോവയിലെ മോര്മുഗാവോ താലൂക്കിലെ പെഡ്രോ ഗാലെ കോട്ട എന്നറിയപ്പെടുന്ന 16,850 ചതുരശ്ര മീറ്റര് കാര്ഷിക സ്വത്ത്, ഗോവയിലെ വാസ്കോഡ ഗാമയിലെ വാണിജ്യ കെട്ടിടം എന്നിവ ഇഡി കണ്ടുകെട്ടിയ സ്വത്തുക്കളില് ഉള്പ്പെടുന്നു. ഇതിന് ഏകദേശം 64 കോടി രൂപ മൂല്യമുണ്ട്. സെയിലുമായി ബന്ധമുള്ള ഒരു കമ്പനി നിയമവിരുദ്ധമായി ഇരുമ്പയിര് കയറ്റുമതി ചെയ്തതുമായി ബന്ധപ്പെട്ടതാണ് കേസ്. 2010ല് കര്ണാടക ലോകായുക്ത കേസ് അന്വേഷിച്ചപ്പോള്, ബെല്ലാരിയില് നിന്ന് ബെലെക്കേരി തുറമുഖത്തേക്ക് ഏകദേശം എട്ടു ലക്ഷം ടണ് നിയമവിരുദ്ധമായി കടത്തിയ ഇരുമ്പയിര് കണ്ടെത്തിയതായി ഇഡി പറഞ്ഞു.
ആഗസ്റ്റ് 13,14 തീയതികളില് കാര്വാര്, മുംബൈ, ഗോവ, ഡല്ഹി എന്നിവിടങ്ങളില് ഇഡി റെയ്ഡു നടത്തി. എസ്എംഎസ്പിഎല്ലിന്റെ എംഡി എന്ന നിലയില് സെയില്, വിവിധ വിതരണക്കാരില് നിന്ന് ഏകദേശം 1.54 ലക്ഷം മെട്രിക് ടണ് തൂക്കം വരുന്ന ഇരുമ്പയിര് വാങ്ങിയതായി ഇഡി പറയുന്നു. സതീഷ് കൃഷ്ണ സെയില്, തുറമുഖ കണ്സര്വേറ്ററുമായി ചേര്ന്ന് നിയമവിരുദ്ധമായി സംഭരിച്ച ഇരുമ്പയിര് എംവി കൊളംബിയ, എംവി മന്ദാരിന് ഹാര്വെസ്റ്റ് തുടങ്ങിയ കപ്പലുകള് വഴി ചൈനയിലേക്ക് കയറ്റുമതി ചെയ്തതായും ഹോങ്കോങ്ങില് മറ്റൊരു കമ്പനി തുറന്നുവെന്നും ഇഡി പറയുന്നു.