തിരുവനന്തപുരം: ശസ്ത്രക്രിയക്കിടെ ഗൈഡ് വയര് നെഞ്ചില് കുടുങ്ങിയ സുമയ്യക്ക് വീണ്ടും നിരാശ. ശസ്ത്രക്രിയ നടത്തി ഗൈഡ് വയര് പുറത്തെടുക്കുന്നത് തല്ക്കാലം ഉപേക്ഷിക്കുകയാണെന്ന് തിരുവനന്തപുരം മെഡിക്കല് കോളജിലെ ഡോക്ടര്മാര്. ഇതോടെ, മൈനര് സര്ജറിയിലൂടെ ഗൈഡ് വയര് പുറത്തെടുക്കാനുള്ള നീക്കം ഇല്ലാതായി.
നേരത്തെ, ഗൈഡ് വയര് പുറത്ത് എടുക്കാതിരിക്കുന്നതാണ് ഉചിതം എന്നായിരുന്നു മെഡിക്കല് ബോര്ഡ് നിര്ദേശം. ധമനികളോട് ഒട്ടിച്ചേര്ന്നതിനാല്, വയര് മാറ്റാന് ശ്രമിക്കുന്നത് സങ്കീര്ണമാകുമെന്നായിരുന്നു വിലയിരുത്തല്.ശ്വാസംമുട്ടല് അടക്കം കടുത്ത ആരോഗ്യ പ്രശ്നങ്ങള് നേരിടുന്ന സുമയ്യ പരാതി നല്കിയിരുന്നു. പിന്നീട് നടന്ന തുടര്പരിശോധനയില് ഗൈഡ് വയറിന് അനക്കമുണ്ടെന്ന് ഡോക്ടര്മാര് കണ്ടെത്തുകയായിരുന്നു.
2023 മാര്ച്ച് 22ന് ജനറല് ആശുപത്രിയില് നടത്തിയ ശസ്ത്രക്രിയയ്ക്കിടെയാണ് സുമയ്യയുടെ നെഞ്ചില് ഗൈഡ് വയര് കുടുങ്ങിയത്. ശസ്ത്രക്രിയയ്ക്കു ശേഷം ശ്വാസതടസ്സം ഉള്പ്പെടെയുള്ള പ്രശ്നങ്ങളുമായി സുമയ്യ ചികിത്സ തേടിയിരുന്നു. 2025 ഏപ്രിലില് എക്സ്റേ എടുത്തപ്പോഴാണ് ഗൈഡ് വയര് കുടുങ്ങിക്കിടക്കുന്നതായി സ്ഥിരീകരിച്ചത്. ഗൈഡ് വയര് കുടുങ്ങിയ വിവരം അറിഞ്ഞ ജനറല് ആശുപത്രി അധികൃതര് ഏപ്രിലില് സുമയ്യയെ ശ്രീചിത്ര മെഡിക്കല് സെന്ററിലേക്കു റഫര് ചെയ്തിരുന്നു. രണ്ടര വര്ഷം കഴിഞ്ഞതിനാല് ഗൈഡ് വയര് പുറത്തെടുക്കാന് സാധിക്കില്ലെന്നായിരുന്നു ശ്രീചിത്രയില് നിന്നുള്ള മറുപടി.