സ്ഥാനാര്ഥികളുടെ മരണം; തിരഞ്ഞെടുപ്പ് മാറ്റിവച്ച വാര്ഡുകളില് ജനുവരി 13ന് വോട്ടെടുപ്പ്
തിരഞ്ഞെടുപ്പ് വിജ്ഞാപനം നാളെ പുറപ്പെടുവിക്കും
തിരുവനന്തപുരം: സ്ഥാനാര്ഥികളുടെ മരണത്തെ തുടര്ന്ന് തിരഞ്ഞെടുപ്പ് മാറ്റിവച്ച തിരുവനന്തപുരം കോര്പ്പറേഷനിലെ വിഴിഞ്ഞം വാര്ഡ്, മലപ്പുറം മൂത്തേടം പഞ്ചായത്തിലെ പായിമ്പാടം വാര്ഡ്, എറണാകുളം പാമ്പാക്കുട പഞ്ചായത്തിലെ ഓണക്കൂര് വാര്ഡ് എന്നിവിടങ്ങളിലെ വോട്ടെടുപ്പ് ജനുവരി 13ന് നടക്കും. ജനുവരി 14നാണ് വോട്ടെണ്ണല്. തിരഞ്ഞെടുപ്പ് വിജ്ഞാപനം നാളെ പുറപ്പെടുവിക്കും. ഡിസംബര് 24വരെയാണ് നാമനിര്ദ്ദേശ പത്രിക സമര്പ്പിക്കാനുള്ള അവസാന തീയതി.
സ്വതന്ത്ര സ്ഥാനാര്ത്ഥിയായിരുന്ന ജസ്റ്റിന് ഫ്രാന്സിസിന്റെ നിര്യാണത്തെ തുടര്ന്നാണ് വിഴിഞ്ഞത്ത് തിരഞ്ഞെടുപ്പ് മാറ്റിവച്ചത്. വാഹനാപടകത്തിലായിരുന്നു ജസ്റ്റിന് മരിച്ചത്. നിലവില് എല്ഡിഎഫിന്റെ സിറ്റിങ് സീറ്റായ വിഴിഞ്ഞത്തെ തിരഞ്ഞെടുപ്പ് ഫലം ആര്ക്കും ഒറ്റയ്ക്ക് ഭരിക്കാന് ഭൂരിപക്ഷമില്ലാത്ത് തിരുവനന്തപുരം നഗരസഭയെ സംബന്ധിച്ച് നിര്ണ്ണായകമാണ്. നിലവില് 50 സീറ്റുകളുമായി ബിജെപിയാണ് ഒറ്റകക്ഷി. ഇടതുമുന്നണി യുഡിഎഫ് 19 സ്വതന്ത്രര് രണ്ട് എന്നിങ്ങനെയാണ് തിരുവന്തപുരം കോര്പ്പറേഷനിലെ കക്ഷിനില.
മലപ്പുറം മൂത്തേടം പഞ്ചായത്തിലെ പായിമ്പാടം വാര്ഡില് മല്സരിച്ച യുഡിഎഫ് സ്ഥാനാര്ഥി വട്ടത്ത് ഹസീന ഡിസംബര് ഏഴിന് രാത്രിയാണ് കുഴഞ്ഞു വീണ് മരിച്ചത്. തിരഞ്ഞെടുപ്പ് ഫലം പുറത്ത് വന്നപ്പോള് യുഡിഎഫ് സമഗ്രാധിപത്യം നേടിയ മൂത്തേടം പഞ്ചായത്തില് പായിമ്പാടം വാര്ഡിലെ തിരഞ്ഞെടുപ്പ് ഫലം നിര്ണ്ണായകമല്ല.
തിരഞ്ഞെടുപ്പിന് മുന്പായിരുന്നു എറണാകുളം പാമ്പാക്കുട പഞ്ചായത്തിലെ ഓണക്കൂര് വാര്ഡിലെ യുഡിഎഫ് സ്ഥാനാര്ഥിയായിരുന്ന സി എസ് ബാബു അന്തരിച്ചത്. ഹൃദയാഘാതത്തെ തുടര്ന്നായിരുന്നു അന്ത്യം. തിരഞ്ഞെടുപ്പ് ഫലം പുറത്ത് വന്നപ്പോള് പാമ്പാക്കുട പഞ്ചായത്തില് യുഡിഎഫ് ഭരണം ഉറപ്പിച്ചിരുന്നു അതിനാല് തന്നെ ഓണക്കൂര് വാര്ഡിലെ തിരഞ്ഞെടുപ്പ് ഫലം നിര്ണ്ണായകമല്ല.