മുംബൈ: പശ്ചിമേഷ്യന് സംഘര്ഷാവസ്ഥ ശക്തമായതിനെ തുടര്ന്ന് ആഗോള വിപണിയില് ക്രൂഡ് ഓയില് വില കുത്തനെ ഉയര്ന്നതോടെ ഇന്ത്യന് ഓഹരി വിപണികള് ഇന്ന് കനത്ത ഇടിവോടെ വ്യാപാരം ആരംഭിച്ചു. ബ്രെന്റ് ക്രൂഡ് ബാരലിന് 101.86 ഡോളറിലെത്തിയതാണ് വിപണിയെ ബാധിച്ചത്.
ഇറാനിയന് തുറമുഖങ്ങള്ക്കെതിരേ നാവിക ഉപരോധത്തിന് അമേരിക്ക തയ്യാറെടുക്കുന്നതും ഇറാനിനെതിരായ സൈനിക നീക്കങ്ങള് വീണ്ടും ശക്തമാകുമെന്ന ആശങ്കയും നിക്ഷേപകരില് ഭീതിയുണ്ടാക്കി. ഇതിന്റെ പ്രതിഫലനമായി ബിഎസ്ഇ സെന്സെക്സ് ആരംഭ വ്യാപാരത്തില് തന്നെ 1,415 പോയിന്റിലേറെ ഇടിഞ്ഞ് 76,134 നിലവാരത്തിലേക്ക് വീണു. എന്എസ്ഇ നിഫ്റ്റി 50 സൂചികയും ഏകദേശം 480 പോയിന്റ് താഴ്ന്ന് 23,571ല് എത്തി.
തുടര്ന്നും ഇടിവ് തുടരുകയായിരുന്ന വിപണിയില് സെന്സെക്സ് ഏകദേശം 1,545 പോയിന്റ് നഷ്ടത്തില് 76,012 നിലയിലും നിഫ്റ്റി 50 സൂചിക 23,603ല് വ്യാപാരവും നടത്തി. മിഡ്ക്യാപ്, സ്മോള്ക്യാപ് സൂചികകളിലും ശ്രദ്ധേയമായ ഇടിവ് രേഖപ്പെടുത്തി. അതേസമയം, വിദേശ വിപണിയിലെ അനിശ്ചിതത്വം രൂപയുടെ മൂല്യത്തെയും ബാധിച്ചിരിക്കുകയാണ്. യുഎസ് ഡോളറിനെതിരേ രൂപ 57 പൈസ താഴ്ന്ന് 93.30 എന്ന നിലയില് വ്യാപാരം ആരംഭിച്ചു. കഴിഞ്ഞ സെഷനില് ഇത് 92.73 ആയിരുന്നു.