'വില്ലേജ് ഓഫിസില് കയറി വെട്ടും'; നികുതി കുടിശ്ശിക അടയ്ക്കാന് ആവശ്യപ്പെട്ട വില്ലേജ് ഓഫിസറെ ഭീഷണിപ്പെടുത്തി സിപിഎം ഏരിയ സെക്രട്ടറി
പത്തനംതിട്ട: കെട്ടിട നികുതി കുടിശ്ശിക അടയ്ക്കാന് ആവശ്യപ്പെട്ട വില്ലേജ് ഓഫിസറെ ഓഫിസില് കയറി വെട്ടുമെന്ന് ഭീഷണിപ്പെടുത്തി സിപിഎം പത്തനംതിട്ട ഏരിയ സെക്രട്ടറി. നാരങ്ങാനം വില്ലേജ് ഓഫിസറെ ഏരിയ സെക്രട്ടറി എം വി സഞ്ജു ഭീഷണിപ്പെടുത്തുന്ന ഫോണ് സന്ദേശം പുറത്തായി. അതേസമയം, വില്ലേജ് ഓഫിസറാണ് പ്രകോപനപരമായി സംസാരിച്ചതെന്ന് സഞ്ജു മാധ്യമങ്ങളോട് പറഞ്ഞു. വില്ലേജ് ഓഫിസറുടെ പ്രതികരണം ലഭ്യമായില്ല.
2022 മുതല് 2025 വരെ അടയ്ക്കാമെന്ന് പറയുന്നുണ്ടെങ്കിലും നികുതിതുക അടച്ചിട്ടില്ലെന്നും ഡെപ്യൂട്ടി കളക്ടറോടും കലക്ടറോടും മറുപടി പറയേണ്ടത് തങ്ങളാണെന്നും നിങ്ങളൊക്കെ വലിയ ആളുകളാണെന്നും വില്ലേജ് ഓഫീസര് സഞ്ജുവിനോട് പറയുന്നു. സാഹചര്യമുണ്ടെങ്കില് നാളെ ഉച്ചയ്ക്ക് മുമ്പ് കെട്ടിടനികുതി അടയ്ക്കണമെന്നും വില്ലേജ് ഓഫീസര് നിര്ദേശം നല്കി.
ആദ്യം സൗഹൃദപരമായി മുന്നോട്ട് നീങ്ങിയ സംഭാഷണം പിന്നീട് പ്രകോപനപരമാകുകയായിരുന്നു. ഏത് നാട്ടുകാരനാണെന്ന് ഏരിയ സെക്രട്ടറി ചോദിച്ചപ്പോള് ഞാന് ഈ കേരളത്തില് തന്നെയുള്ള ആളാണെന്നായിരുന്നു വില്ലേജ് ഓഫീസര് മറുപടി നല്കിയത്. ഇനിയിത് നീട്ടിക്കൊണ്ടുപോകാന് സാധിക്കില്ല, നികുതി അടയ്ക്കണമെന്നും വില്ലേജ് ഓഫീസര് പറഞ്ഞു. അടച്ചില്ലെങ്കിലോ എന്ന സഞ്ജുവിന്റെ ചോദ്യത്തിന് നടപടി സ്വീകരിക്കുമെന്നു ഓഫീസര് പറഞ്ഞതോടെയാണ് വില്ലേജ് ഓഫീസില് കയറി വെട്ടുമെന്ന് ഭീഷണി മുഴക്കിയത്.