വാറന്റി കാലയളവില് മൊബൈല് ഫോണിന്റെ തകരാര് പരിഹരിച്ചില്ല; 98,690 രൂപ നഷ്ടപരിഹാരം നല്കണം
കൊച്ചി: വാറന്റി കാലയളവില് മൊബൈല് ഫോണിന്റെ ഫ്ളിപ്പ് സംവിധാനത്തിലെ തകരാര് പരിഹരിച്ച് നല്കാതിരുന്ന മൊബൈല് ഫോണ് കമ്പനി 98,690 രൂപ നഷ്ടപരിഹാരം നല്കണമെന്ന് എറണാകുളം ജില്ല ഉപഭോക്തൃ തര്ക്ക പരിഹാര കമ്മീഷന്. മൂവാറ്റുപുഴ പോത്താനിക്കാട് സ്വദേശി ജോജോ മോന് സേവിയര് സാംസങ് ഇന്ത്യ ഇലക്ട്രോണിക്സിനെതിരെ സമര്പ്പിച്ച പരാതിയിലാണ് ഉത്തരവ്.
2022 നവംബറിലാണ് ജോജോ മോന് കോതമംഗലത്തെ സെല്സ്പോട്ട് മൊബൈല്സ് എന്ന സ്ഥാപനത്തില് നിന്നും ഫോണ് വാങ്ങിയത്. 2023 ഒക്ടോബറില് ഫോണിന്റെ ഫ്ളിപ്പ് സംവിധാനത്തില് തകരാര് സംഭവിക്കുകയും ഓതറൈസ്ഡ് സര്വീസ് സെന്ററിനെ സമീപിച്ചപ്പോള് 33,218 രൂപ അടച്ചാല് റിപ്പയര് ചെയ്തു നല്കാമെന്ന് അറിയിച്ചു. വാറന്റി കാലയളവില് തകരാര് സംഭവിച്ചാല് റിപ്പയര് ചെയ്തു നല്കേണ്ട ഉത്തരവാദിത്തില് നിന്നും കമ്പനി ഒഴിഞ്ഞുമാറിയ സാഹചര്യത്തിലാണ് പരാതിക്കാരന് കമ്മീഷനെ സമീപിച്ചത്.