ആദിവാസി യുവാവിനെ വനംവകുപ്പ് ഉദ്യോഗസ്ഥര് കെട്ടിയിട്ട് മര്ദ്ദിച്ചെന്ന് പരാതി
മലമ്പുഴ; ആദിവാസി യുവാവിനെ വനംവകുപ്പ് ഉദ്യോഗസ്ഥര് കെട്ടിയിട്ട് മര്ദ്ദിച്ചെന്ന് പരാതി. ചെറാട് സ്വദേശി രാധയ്ക്കാണ് മര്ദ്ദനമേറ്റത്. പത്തോളം വനം വകുപ്പ് ഉദ്യോഗസ്ഥര് എത്തി രാധയെ കാട്ടിലേക്ക് കൊണ്ടുപോയി കെട്ടിയിട്ട് ക്രൂരമായി മര്ദ്ദിച്ചെന്നാണ് പരാതി.
കഴിഞ്ഞ ഏഴാം തീയതിയാണ് ചെറാടിലെ കാട്ടില് തീയിട്ടെന്ന് ആരോപിച്ച് ആദിവാസി യുവാവിനെ വനം വകുപ്പ് വാച്ചര്മാര് ചേര്ന്നു മര്ദ്ദിച്ചത്. ചെറാട് ഭാഗത്ത് ഗോപാലന് എന്നയാളുടെ പറമ്പില് ജോലിക്ക് ചെന്നതായിരുന്നു ആദിവാസി യുവാവ് രാധ. പ്രദേശത്തെ കുറുമ്പാച്ചി മലയില് നിന്നും പുക ഉയരുന്നത് കണ്ടെന്നും തീവച്ചത് താനാണെന്ന് ആരോപിച്ചായിരുന്നു മര്ദ്ദിച്ചത് എന്നും രാധ പറഞ്ഞു.
പണി ഇല്ലാത്ത സമയത്ത് കാട്ടില് തേന് എടുക്കാന് പോകാറുണ്ടെന്നും, താന് തീയിടാറില്ലെന്നും രാധ പറഞ്ഞു.ജില്ലാ പോലിസ് മേധാവിക്ക് ഉള്പ്പെടെ പരാതി നല്കിയിട്ടും നടപടിയുണ്ടായില്ലെന്ന് യുവാവ് പറഞ്ഞു.