പരിപാടിയുടെ പേരില് 35 ലക്ഷം തട്ടി; മെന്റലിസ്റ്റ് ആദിക്കെതിരേ കേസ്
സംവിധായകന് ജിസ് ജോയി നാലാം പ്രതി
എറണാകുളം: 35 ലക്ഷം രൂപ തട്ടിയെടുത്തെന്ന പരാതിയില് മെന്റലിസ്റ്റ് ആദിക്കെതിരേ കേസ്. ഇന്സോമാനിയ എന്ന പരിപാടിയുടെ പേരില് പണം വാങ്ങി വഞ്ചിച്ചുവെന്നാണ് പരാതി. കൊച്ചി സ്വദേശി മാത്യൂ വി നല്കിയ പരാതിയില് എറണാകുളം സെന്ട്രല് പോലിസാണ് കേസെടുത്തത്. രണ്ടു ഘട്ടമായി 35 ലക്ഷം തട്ടിയെടുത്തു. സംവിധായാകന് ജിസ് ജോയിക്കെതിരേയും കേസെടുത്തിട്ടുണ്ട്. കേസില് നാലാം പ്രതിയാണ് സംവിധായകന് ജിസ് ജോയ്. കേസില് ആകെ നാലു പ്രതികളാണുള്ളത്. കേസിലെ ഒന്നാം പ്രതി മെന്റലിസ്റ്റ് ആദിയെന്ന ആദര്ശ്.
ഇവര്ക്ക് പുറമെ പ്രോഗ്രാമിന്റെ സഹ നിര്മാതാക്കളായ മിഥുന്, അരുണ് എന്നിവരും പ്രതിപ്പട്ടികയിലുണ്ട്. ഇന്സോംനിയ എന്ന മെന്റലിസം പ്രോഗ്രാമില് പണം നിക്ഷേപിച്ചാല് നിക്ഷേപത്തുകയും മൂന്നിലൊന്ന് ലാഭവിഹിതവും നല്കാമെന്ന വാഗ്ദാനം ചെയ്ത് പണം തട്ടിയെന്നാണ് പരാതി. കഴിഞ്ഞ വര്ഷം ജൂലൈ മൂന്നിന് ആദിയുടെ അക്കൗണ്ടിലേക്ക് 23 ലക്ഷവും രണ്ട് ദിവസങ്ങള്ക്കകം 12 ലക്ഷവുമടക്കം 35 ലക്ഷം രൂപ പരാതിക്കാരന് അയച്ചുകൊടുത്തിരുന്നു. എന്നാല്, പണം തിരികെ ആവശ്യപ്പെട്ടപ്പോള് സഹനിര്മാതാക്കളായ മിഥുനും അരുണും സംവിധായകന് ജിസ് ജോയിയും ചേര്ന്ന് പരിഹസിച്ചെന്നും വാഗ്ദാനം ചെയ്ത ലാഭവിഹിതമോ നിക്ഷേപ തുകയോ തിരികെ നല്കിയില്ലെന്നും പരാതിയിലുണ്ട്.