തിരുവനന്തപുരം-കാസര്കോട് റൂട്ടില് അതിവേഗ റെയില് പാതയ്ക്ക് മന്ത്രിസഭ അംഗീകാരം
തിരുവനന്തപുരം: അതിവേഗ റെയില്പാതയുമായി സംസ്ഥാന സര്ക്കാര്. തിരുവനന്തപുരം മുതല് കാസര്കോട് വരേയുള്ള റൂട്ടില് റാപ്പിഡ് റെയില് ട്രാന്സിറ്റ് പദ്ധതിക്ക് മന്ത്രിസഭ തത്വത്തില് അംഗീകാരം നല്കി. 583 കിലോമീറ്റര് നീളത്തിലാണ് 'റീജിയണല് റാപ്പിഡ് ട്രാന്സിറ്റ് സിസ്റ്റം'പദ്ധതി. നേരത്തെ പ്രഖ്യാപിച്ചിരുന്ന സില്വര് ലൈന് പദ്ധതിക്ക് കേന്ദ്ര റെയില്വേ മന്ത്രാലയത്തില് നിന്നും സാങ്കേതിക അനുമതി ലഭിക്കാത്ത സാഹചര്യത്തിലാണ് പുതിയ നീക്കമെന്നാണ് സംസ്ഥാന സര്ക്കാര് പറയുന്നത്. നാലു ഘട്ടമായാണ് പദ്ധതി നടപ്പാക്കുക. പദ്ധതിക്കായി സംസ്ഥാനത്തിന്റെ താല്പര്യം അറിയിച്ച് കേന്ദ്ര സര്ക്കാരിന് ഔപചാരികമായി കത്തയക്കും. അതിനാവശ്യമായ കൂടിയാലോചനകള് ആരംഭിക്കുവാനും ഗതാഗത വകുപ്പിനെ മന്ത്രിസഭ ചുമതലപ്പെടുത്തി
കെ-റെയില് പദ്ധതിയുമായി മുന്നോട്ടുപോകാന് കഴിയാത്ത സാഹചര്യത്തിലാണ് അതിവേഗ റെയില് പദ്ധതിയുമായി കേരളം മുന്നോട്ട് പോകുന്നത്. ഡല്ഹി-മിററ്റ് ആര്ആര്ടിഎസ് മാതൃകയിലാണ് കേരളത്തിലും നടപ്പാക്കുക. മണിക്കൂറില് 160-180 കിലോമീറ്റര് വരെ വേഗം, കുറഞ്ഞ സ്റ്റേഷന് ഇടവേള, ഉയര്ന്ന യാത്രാ ശേഷി എന്നിവയാണ് പ്രത്യേകത. മീററ്റ് മെട്രോ എന്നത് ആര്ആര്ടിഎസുമായി സംയോജിപ്പിച്ചാണ് പ്രവര്ത്തിക്കുന്നത്. ഈ സംവിധാനം പൂര്ണമായും ഗ്രേഡ്-സെപ്പറേറ്റഡായാണ് നടപ്പിലാക്കുക.
സംസ്ഥാനത്തിന്റെ ജനസാന്ദ്രതയും പരിസ്ഥിതി പരിരക്ഷ ആവശ്യമായ ഭൂപ്രകൃതിയും കണക്കിലെടുത്ത്, തറനിരപ്പില് കൂടെയുള്ള മോഡലിന് പകരം തൂണുകള് വഴിയുള്ള മോഡലാണ് സ്വീകരിക്കുന്നത്. ഇതിലൂടെ ഭൂമിയേറ്റെടുപ്പ് ഗണ്യമായി കുറയ്ക്കുവാനും പ്രകൃതിദത്ത ജലപ്രവാഹം തടസ്സപ്പെടുന്നത് ഒഴിവാക്കാനും ചില പ്രദേശങ്ങളില് ഉയര്ന്നു വന്ന അഭിപ്രായ വ്യത്യാസങ്ങള് കുറയ്ക്കുവാനും സാധിക്കും. പദ്ധതിയുടെ ഭൂരിഭാഗവും തൂണുകളില് കൂടേയും ആവശ്യമുള്ള സ്ഥലങ്ങളില് മാത്രം എംബാങ്ക്മെന്റ്, ടണല് എന്നിവയിലൂടേയുമായിരിക്കും.