മുംബൈ: ആദ്യകാല ബോളിവുഡ് നടി കാമിനി കൗശല്(98)അന്തരിച്ചു. ബോളിവുഡിലെ എക്കാലത്തേയും മികച്ച നടിമാരില് ഒരാളായി കണക്കാക്കുന്ന നടിയാണ് കാമിനി കൗശല്. വ്യാഴാഴ്ച രാത്രി മുംബൈയിലെ വസതിയിലായിരുന്നു അന്ത്യം. ഏഴുപതിറ്റാണ്ടുകാലം ബോളിവുഡില് തിളങ്ങിയ നടി ലാല് സിങ് ഛദ്ദ, കബീര് സിങ്, ചെന്നൈ എക്സ്പ്രസ് തുടങ്ങിയ ചിത്രങ്ങളിലൂടെ പുതുതലമുറയ്ക്കും പരിചിതയാണ്. ഇന്ത്യന് സിനിമയുടെ തുടക്കകാലത്തെ താരങ്ങളിലൊരാളാണ് കാമിനി കൗശല്.
1946ല് ചേതന് ആനന്ദിന്റെ നീച്ച നഗര് എന്ന ചിത്രത്തിലൂടെയാണ് അരങ്ങേറ്റം. ഈ ചിത്രം കാന് ചലച്ചിത്രമേളയില് പാംദിയോര് പുരസ്കാരം നേടി. നാളിതുവരെ മികച്ച സിനിമക്കുള്ള പാം ഡി ഓര് നേടിയ ഏക ഇന്ത്യന് സിനിമയാണിത്. ദോ ബായ്, ശഹീദ്, സിദ്ധി, ശബ്നം, ബഡേ സര്ക്കാര്, ജെയ്ലര്, ആര്സൂ, നദിയാ കെ പാര് തുടങ്ങിയ സിനിമകളില് നായികയായി കാമിനി കൗശല് അഭിനയിച്ചിട്ടുണ്ട്. പിന്നീട് ക്യാരക്ടര് റോളുകളിലേക്ക് ചുവടുമാറ്റുകയായിരുന്നു.
നിലവില് പാകിസ്താന്റെ ഭാഗമായ ലാഹോറിലാണ് നടിയുടെ ജനനം. ഇന്ത്യന് ബ്രയോളജിയുടെ പിതാവ് എന്നറിയപ്പെടുന്ന പ്രശസ്ത സസ്യശാസ്ത്രജ്ഞന് പ്രൊഫ. ശിവ് റാം കാശ്യപിന്റെ മകളാണ്. 40കളില് ബോളിവുഡില് ഏറ്റവും കൂടുതല് പ്രതിഫലം വാങ്ങുന്ന നായികമാരില് ഒരാളായിരുന്നു.
1963ഓടെ സ്വഭാവ വേഷങ്ങളിലേക്കു മാറി. ദോ രാസ്തേ, പ്രേം നഗര്, മഹാചോര് തുടങ്ങിയ സിനിമകളില് തുടര്ന്നും തിളങ്ങി. കരിയറിന്റെ അവസാന വര്ഷങ്ങളില് ഷാരൂഖ് ഖാന്റെ ചെന്നൈ എക്സ്പ്രസ്, ഷാഹിദ് കപൂറിന്റെ കബീര് സിങ് തുടങ്ങിയ ബ്ലോക്ക് ബസ്റ്റര് സിനിമകളിലും അവര് അഭിനയിച്ചു. ആമിര് ഖാന്റെ ലാല് സിങ് ഛദ്ദയിലെ അതിഥിവേഷത്തിലാണ് അവര് അവസാനമായി പ്രത്യക്ഷപ്പെട്ടത്.