രാഷ്ട്രീയ പക തീര്ക്കാന് മാധ്യമ സ്ഥാപനങ്ങള്ക്കുനേരെ ആക്രമണം നടത്തുന്നത് ജനാധിപത്യ വിരുദ്ധം; കേരള പത്രപ്രവര്ത്തക യൂണിയന്
ജോലി സമ്മര്ദം ചൂണ്ടിക്കാണിച്ച് രണ്ടു മാധ്യമപ്രവര്ത്തകര് രംഗത്ത് വന്നതിനുപിന്നാലെയാണ് റിപ്പോര്ട്ടര് ടിവി തൃശൂര് ബ്യൂറോ ഓഫീസില് യൂത്ത് കോണ്ഗ്രസ് അതിക്രമം നടത്തിയത്
തിരുവനന്തപുരം: രാഷ്ട്രീയ പക തീര്ക്കാന് മാധ്യമ സ്ഥാപനങ്ങള്ക്ക് നേരെ ആക്രമണം നടത്തുന്നത് ജനാധിപത്യ വിരുദ്ധമെന്ന് കേരള പത്രപ്രവര്ത്തക യൂണിയന്. റിപ്പോര്ട്ടര് ടിവി തൃശൂര് ബ്യൂറോ ഓഫീസില് കരിഓയിലൊഴിച്ച് യൂത്ത് കോണ്ഗ്രസ് പ്രവര്ത്തകര് നടത്തിയ അതിക്രമം പ്രതിഷേധകരമാണ്. നിയമപരമായി കൈകാര്യം ചെയ്യേണ്ട വിഷയങ്ങള് അക്രമത്തിലൂടെ നേരിടാനുള്ള ശ്രമം അങ്ങേയറ്റം അപലപനീയമാണെന്നും പത്രപ്രവര്ത്തക യൂണിയന്.
ജോലി സമ്മര്ദം ചൂണ്ടിക്കാണിച്ച് രണ്ടു മാധ്യമപ്രവര്ത്തകര് രംഗത്ത് വന്നതിനുപിന്നാലെയാണ് തൃശൂര് ബ്യൂറോ ഓഫീസില് യൂത്ത് കോണ്ഗ്രസ് അതിക്രമം നടത്തിയത്. മാധ്യമ സ്ഥാപനത്തിന്റെ നയനിലപാടുകളെ ശക്തമായ എതിര് നയ നിലപാടുകളില് ഊന്നിയ വാദങ്ങളിലൂടെ പ്രതിരോധിക്കുന്നതിന് പകരം അക്രമത്തിന് തുനിയുന്നത്. നിയമവാഴ്ചയോടുള്ള വെല്ലുവിളിയായേ കാണാനാവൂ. മാധ്യമ സ്വാതന്ത്ര്യത്തിനെതിരായ ഇത്തരം നടപടി അവസാനിപ്പിക്കാനും അണികളെ നിയന്ത്രിക്കാനും കോണ്ഗ്രസ് നേതൃത്വം അടിയന്തരമായി ഇടപെടണമെന്നും, കുറ്റവാളികളെ ഉടന് കസ്റ്റഡിയിലെടുത്ത് മാതൃകാപരമായ ശിക്ഷ ഉറപ്പുവരുത്തുന്നതിന് പോലിസും കര്ക്കശ നടപടി സ്വീകരിക്കണമെന്നും കേരള പത്രപ്രവര്ത്തക യൂണിയന്.
അതേസമയം, രണ്ടു വനിത മാധ്യമപ്രവര്ത്തകര് സാമൂഹിക മാധ്യമങ്ങളിലൂടെ പുറത്തുവിട്ട വിവരങ്ങള് ഞെട്ടിക്കുന്നതാണ്. ജോലി തുടരാന് കഴിയാത്ത വിധം തൊഴില് സമ്മര്ദങ്ങള് വഷളാവുകയും സുരക്ഷിതമായ തൊഴില് അന്തരീക്ഷം നഷ്ടമാവുകയും ചെയ്യുന്നത് ഒരു സ്ഥാപനത്തിനും ഭൂഷണമല്ല. പരാതി കിട്ടിയാല് നടപടി സ്വീകരിക്കുമെന്ന മാനേജ്മെന്റ് നിലപാട് സ്വാഗതാര്ഹമാണെങ്കിലും ഇത്രയും ഗുരുതരമായ വെളിപ്പെടുത്തലുകളുടെ പശ്ചാത്തലത്തില് പരാതിക്ക് കാത്തുനില്ക്കാതെ നിഷ് പക്ഷമായ അന്വേഷണം നടത്തി നടപടി സ്വീകരിക്കുകയാണ് റിപ്പോര്ട്ടര് ടി.വി അധികാരികള് ചെയ്യേണ്ടത്. ഭാവിയില് ഇത്തരം സാഹചര്യങ്ങള് ഒഴിവാക്കി തൊഴില് സൗഹൃദ പണിയിടം എന്ന പ്രതിച്ഛായ ഉറപ്പ് വരുത്താന് മാനേജ്മെന്റ് അടിയന്തര നടപടി സ്വീകരിക്കണമെന്ന് യൂണിയന് പ്രസിഡന്റ് കെ.പി റജിയും ജനറല് സെക്രട്ടറി സുരേഷ് എടപ്പാളുംആവശ്യപ്പെട്ടു.