തിരുവനന്തപുരം: യുഎഇയിലെ ഷാര്ജയില് കൊല്ലം സ്വദേശിനി അതുല്യയെ മരിച്ച നിലയില് കണ്ടെത്തിയ സംഭവത്തില് ഭര്ത്താവ് സതീഷിനെ പോലിസ് അറസ്റ്റ് ചെയ്തു. ഇന്ന് രാവിലെ തിരുവനന്തപുരം വിമാനത്താവളത്തില് വന്നിറങ്ങിയപ്പോള് ഇമിഗ്രേഷന് ഉദ്യോഗസ്ഥര് കസ്റ്റഡിയില് എടുക്കുകയായിരുന്നു. തുടര്ന്ന് വലിയതുറ പോലിസിന് കൈമാറി.
ജൂലായ് 19-നാണ് കൊല്ലം ചവറ തെക്കുംഭാഗം കോയിവിള സ്വദേശിനി അതുല്യ(30)യെ ഷാര്ജയിലെ ഫ്ളാറ്റില് മരിച്ചനിലയില് കണ്ടെത്തിയത്. ഭര്ത്താവ് സതീഷ് ശങ്കറിന്റെ നിരന്തരം പീഡനവും ഉപദ്രവുമാണ് അതുല്യയുടെ മരണത്തിലേക്ക് നയിച്ചതെന്നായിരുന്നു പരാതി. ഭര്ത്താവിന്റെ ഉപദ്രവം സംബന്ധിച്ച് അതുല്യ സുഹൃത്തുക്കളോട് വെളിപ്പെടുത്തിയതിന്റെ ശബ്ദരേഖയും ഭര്ത്താവ് ഉപദ്രവിക്കുന്ന വീഡിയോദൃശ്യങ്ങളും പുറത്തുവന്നിരുന്നു. സംഭവത്തിന് പിന്നാലെ ദുബായില് സൈറ്റ് എന്ജിനീയറായ സതീഷിനെ കമ്പനി ജോലിയില്നിന്ന് പിരിച്ചുവിടുകയുംചെയ്തിരുന്നു.