നിയമസഭ തിരഞ്ഞെടുപ്പ്; കേരളത്തില് ചൊവ്വ, ബുധന് ദിവസങ്ങളില് കോണ്ഗ്രസ് ചര്ച്ചകള് നടത്തും
മധുസൂദന് മിസ്ത്രിയും സച്ചിന് പൈലറ്റും എത്തും
തിരുവനന്തപുരം: നിയമസഭ തിരഞ്ഞെടുപ്പില് സ്ഥാനാര്ഥി നിര്ണ്ണയത്തിലേക്ക് കടക്കാന് കോണ്ഗ്രസ്. മധുസൂദന് മിസ്ത്രി ചെയര്മാനായ എഐസിസി സ്ക്രീനിങ് കമ്മിറ്റി 13,14 തീയതികളില് ചൊവ്വ, ബുധന് ദിവസങ്ങളിലായി കേരളത്തില് ചര്ച്ചകള് നടത്തും. കനഗോലുവിന്റെ റിപോര്ട്ടും സ്ഥാനാര്ഥി നിര്ണ്ണയത്തില് മാനദണ്ഡമാക്കും. ആദ്യ പട്ടിക ജനുവരി അവസാനത്തോടെ പുറത്തു വിടാനാണ് ആലോചന. ഫെബ്രുവരി പകുതിയോടെ മുഴുവന് സ്ഥാനാര്ഥികളേയും പ്രഖ്യാപിക്കും.
ഏറെ പ്രതീക്ഷയര്പ്പിക്കുന്ന കേരളത്തിലെ നിയമസഭ തിരഞ്ഞെടുപ്പിനായി ചെയ്യാനുള്ളതെല്ലാം ദ്രുതഗതിയില് മുന്നോട്ട് കൊണ്ടു പോവുകയാണ് കോണ്ഗ്രസ് ദേശീയ നേതൃത്വം. പ്രാഥമിക ചര്ച്ചകള്ക്കായി മധുസൂദന് മിസ്ത്രി ചെയര്മാനായ എഐസിസി സ്ക്രീനിങ് കമ്മിറ്റി അംഗങ്ങള് അടുത്തയാഴ്ച തിരുവനന്തപുരത്ത് എത്തും. എ കെ ആന്റണി ഉള്പ്പെടെയുള്ള മുതിര്ന്ന നേതാക്കളുമായി കൂടിക്കാഴ്ച നടത്തും. ജയസാധ്യത തന്നെയാകണം പ്രധാനമാനദണ്ഡം എന്നാണ് എഐസിസി നിര്ദേശം. സാമൂഹികനീതിയും യുവ-വനിതാ പ്രാതിനിധ്യവും ഉറപ്പാക്കിയാകണം സ്ഥാനാര്ഥി പട്ടിക.
2011 നിയമസഭാ തിരഞ്ഞെടുപ്പുസമയത്ത് സംസ്ഥാനത്തിന്റെ ചുമതലയുള്ള ജനറല് സെക്രട്ടറിയായിരുന്നു മിസ്ത്രി. സയ്യിദ് നാസിര് ഹുസൈന്, നീരജ് ദങ്കി, അഭിഷേക് ദത്ത് എന്നവരാണ് സ്ക്രീനിങ് കമ്മിറ്റിയിലെ മറ്റ് അംഗങ്ങള്. തിരഞ്ഞെടുപ്പ് പ്രവര്ത്തനങ്ങളുടെ ഏകോപനത്തിനുള്ള എഐസിസി നിരീക്ഷകരായ കെ ജെ ജോര്ജ്, സച്ചിന് പൈലറ്റ്, കനയ്യ കുമാര്, ഇമ്രാന് പ്രതാപ് ഗഡി എന്നിവരും രണ്ടാഴ്ചക്കുള്ളില് സംസ്ഥാനത്തെത്തും.
നൂറിലധികം സീറ്റുകള് യുഡിഎഫ് ലക്ഷ്യമിടുമ്പോള് 75വരെ സീറ്റ് കിട്ടാമെന്നാണ് കനഗോലുവിന്റേതടക്കം എഐസിസിക്ക് മുന്പിലുള്ള സര്വേകള് പ്രവചിക്കുന്നത്. ഘടകകക്ഷികളില് ലീഗിന്റെ സ്ട്രൈക്ക് റേറ്റ് ഉയരാമെന്നും സര്വേകള് ചൂണ്ടിക്കാട്ടുന്നു. ദേശീയ നേതാക്കളുടെ നിരയും കേരളത്തിലേക്കെത്തും. രാഹുല് ഗാന്ധിയും പ്രിയങ്ക ഗാന്ധിയും മല്ലികാര്ജ്ജുന് ഖര്ഗെയുമടക്കമുള്ള നേതാക്കളും പ്രചാരണത്തില് സജീവമാകും. പരമാവധി മണ്ഡലങ്ങളില് നേതാക്കളെ എത്തിക്കാനാണ് നീക്കം.