അനധികൃത മയക്കുമരുന്ന് വില്പ്പന തടയല്; സ്വകാര്യ മേഖലയുമായി ചേര്ന്ന് 'പോഡ' പദ്ധതിക്ക് തുടക്കം
തിരുവനന്തപുരം: മയക്കുമരുന്ന് ഉപയോഗം തടയുന്നതിന് സംസ്ഥാന പോലിസ് സ്വകാര്യ മേഖലയുമായി സഹകരിച്ച് നടപ്പാക്കുന്ന 'പോഡ' (പ്രിവന്ഷന് ഓഫ് ഡ്രഗ് അബ്യൂസ്) പദ്ധതിക്ക് സംസ്ഥാനത്ത് തുടക്കമായി. സിഐഐയുടെ 40 വയസ്സിന് താഴെയുള്ള അംഗങ്ങളടങ്ങുന്ന യങ് ഇന്ത്യന്സ് സംഘടനയുടെ സഹകരണത്തോടെയാണ് പദ്ധതിയുടെ ആദ്യഘട്ടം നടപ്പാക്കുന്നത്. യങ് ഇന്ത്യന്സിന്റെ ഭാഗമായ 21 കമ്പനികളില് നിന്നുള്ള ഏകദേശം 1,100 യുവതീയുവാക്കള് പദ്ധതിയില് പങ്കാളികളാകുമെന്ന് സംസ്ഥാന പോലിസ് മേധാവി റവാഡ ചന്ദ്രശേഖര് വാര്ത്താസമ്മേളനത്തില് അറിയിച്ചു. ജോലി ആരംഭിക്കുന്ന ഘട്ടത്തില് മയക്കുമരുന്ന് ദുരുപയോഗത്തില് നിന്ന് വിട്ടുനില്ക്കുമെന്ന് നിര്ബന്ധിത പ്രതിജ്ഞ എഴുതി വാങ്ങുക, ജോലിസമയത്ത് മയക്കുമരുന്ന് പരിശോധനയ്ക്ക് വിധേയമാകാന് ജീവനക്കാരുടെ സമ്മതം നേടുക, പരിശോധനയില് ലഹരി ഉപയോഗം കണ്ടെത്തിയാല് പിരിച്ചുവിടല് ഉള്പ്പെടെയുള്ള കര്ശന നടപടികള് സ്വീകരിക്കുക എന്നിവയാണ് പദ്ധതിയുടെ ഭാഗമായി നടപ്പാക്കുന്നത്.
പദ്ധതിയില് പങ്കാളികളാകുന്നതോടെ, കോര്പ്പറേറ്റ് നേതൃത്വത്തിലുള്ള മയക്കുമരുന്ന് പ്രതിരോധ പ്രവര്ത്തനങ്ങള്ക്ക് സ്വകാര്യമേഖല ഒരു മാതൃകയായി മാറുമെന്ന് പോലിസ് മേധാവി വ്യക്തമാക്കി. ഇതുവഴി സ്വകാര്യ ഐടി മേഖലയടക്കമുള്ള മറ്റു സ്ഥാപനങ്ങള്ക്കും സമാന നടപടികള് സ്വീകരിക്കാന് പ്രചോദനം ലഭിക്കുമെന്നും അദ്ദേഹം പറഞ്ഞു. സര്ക്കാരിന്റെ അനുമതിയോടെ സര്ക്കാര് സ്ഥാപനങ്ങളിലും 'പോഡ' പദ്ധതി നടപ്പാക്കുന്നതിനുള്ള നടപടികള് പരിഗണിക്കുമെന്നും വ്യക്തമാക്കി. അതേസമയം, മയക്കുമരുന്ന് വ്യാപനത്തിനെതിരേ സംസ്ഥാനത്ത് നടപ്പാക്കിയ 'ഡി ഹണ്ട്' സ്പെഷ്യല് ഡ്രൈവിന്റെ ഭാഗമായി ഈ വര്ഷം ഇതുവരെ 30,991 കേസുകള് രജിസ്റ്റര് ചെയ്തതായി പോലിസ് മേധാവി അറിയിച്ചു. ഇതില് 349 കേസുകള് വ്യവസായിക അളവില് ലഹരി വസ്തുക്കള് പിടിച്ചെടുത്തതിനും, 957 കേസുകള് ഇടത്തരം അളവുകളും, 7,718 കേസുകള് ചെറിയ അളവുകളും പിടിച്ചെടുത്തതിനുമാണെന്ന് അദ്ദേഹം വ്യക്തമാക്കി.
വാര്ത്താസമ്മേളനത്തില് എഡിജിപി എച്ച് വെങ്കിടേഷ്, ദക്ഷിണ മേഖലാ ഐജി ശ്യാംസുന്ദര്, ഡിഐജി അജിതാ ബീഗം തുടങ്ങിയ ഉന്നത പോലിസ് ഉദ്യോഗസ്ഥര് പങ്കെടുത്തു.