മാറാട് കലാപ പരാമര്ശത്തിലൂടെ വിദ്വേഷ പ്രചരണം നടത്തിയ എ കെ ബാലനെതിരേ കേസെടുക്കണം: ഫ്രറ്റേണിറ്റി മൂവ്മെന്റ്
ഫ്രറ്റേണിറ്റി റാലിയും പൊതുസമ്മേളനവും ഞായറാഴ്ച
കോഴിക്കോട്: മാറാട് കലാപ പരാമര്ശത്തിലൂടെ വിദ്വേഷ പ്രചരണം നടത്തിയ എ കെ ബാലനെതിരേ കേസെടുക്കണമെന്ന് ഫ്രറ്റേണിറ്റി മൂവ്മെന്റ് നേതാക്കള് ആവശ്യപ്പെട്ടു. സംഘ്പരിവാര് ഉയര്ത്തുന്ന ഹിന്ദുത്വ ആശയങ്ങളുടെ പ്രചാരകരായി കേരളത്തിലെ സിപിഎം നേതാക്കള് മാറിയിരിക്കുകയാണ്. യുഡിഎഫ് അധികാരത്തിലെത്തിയാല് ജമാഅത്തെ ഇസ് ലാമിയാകും ആഭ്യന്തരം കൈകാര്യം ചെയ്യുകയെന്നും അങ്ങനെ മാറാട് ആവര്ത്തിക്കുമെന്നുമുള്ള എ കെ ബാലന്റെ പ്രസ്താവന അതിന്റെ ഒടുവിലത്തെ ഉദാഹരണമാണ്. അധികാരത്തുടര്ച്ചക്കു വേണ്ടി വര്ഗീയ-ഇസ് ലാമോഫോബിയ രാഷ്ട്രീയം പയറ്റുന്ന സിപിഎം ബിജെപിക്ക് വഴിതുറന്ന് കൊടുക്കുകയാണെന്നും നേതാക്കള് ചൂണ്ടിക്കാട്ടി.
'വിദ്വേഷ നാവുകളോട് നോ, സാഹോദര്യ മുന്നേറ്റത്തോട് എസ്' എന്ന തലക്കെട്ടില് ഫ്രറ്റേണിറ്റി മൂവ്മെന്റ് സംസ്ഥാന കമ്മിറ്റി ജനുവരി 11 ഞായറാഴ്ച നാലു മണിക്ക് കോഴിക്കോട്ട് സംഘടിപ്പിക്കുന്ന റാലിയും പൊതുസമ്മേളനവും വിശദീകരിച്ച് പ്രസ് ക്ലബ്ബിലെ വാര്ത്ത സമ്മേളനത്തില് സംസാരിക്കുകയായിരുന്നു അവര്.
നവോത്ഥാനത്തിന്റെ പൈതൃകമുയര്ത്തുന്ന ശ്രീനാരായണീയ പ്രസ്ഥാനത്തിന്റെ നേതൃത്വത്തിലിരുന്ന് നിരന്തരം വര്ഗീയ വിഷം തുപ്പുന്ന വെള്ളാപ്പള്ളിയെ ഉടന് തുറങ്കലിലടക്കണം. വിദ്വേഷവും വംശീയതയും നാട്ടില് അതിരുകടന്നാണ് രാം നാരായണ് ഭാഗേലിനെ ബംഗ്ലാദേശിയെന്ന് വിളിച്ച് നമ്മുടെ നാട്ടില് തല്ലിക്കൊല്ലുന്നത്. ഹിന്ദുത്വ രാഷ്ട്രീയം പുറത്തുവിടുന്ന വംശീയ ബോധമാണ് രാം നാരായണിനെ കൊലപ്പെടുത്തിയത്. അദ്ദേഹത്തെ കൊലപ്പെടുത്തിയ മുഴുവന് ആര്എസ്എസ് പ്രവര്ത്തകരേയും ഇപ്പോഴും അറസ്റ്റ് ചെയ്തിട്ടില്ല. വംശീയ, വിദ്വേഷ അജണ്ടകള് തിരഞ്ഞെടുപ്പ് പ്രചാരണ മാര്ഗങ്ങളായി മാറുന്നത് അത്യധികം ആപത്താണ്. നാട്ടില് വളര്ന്നുവരുന്ന വിദ്വേഷ പ്രചരണങ്ങള്ക്കെതിരേ സാഹോദര്യ രാഷ്ട്രീയത്തിലധിഷ്ഠിതമായ മുന്നേറ്റം അനിവാര്യമാണെന്നും നേതാക്കള് കൂട്ടിച്ചേര്ത്തു.
ഞായറാഴ്ച വൈകീട്ട് നാലു മണിക്ക് വെള്ളയില് നിന്നാണ് വിദ്യാര്ഥി-യുവജന റാലി ആരംഭിക്കുക. കുറ്റിച്ചിറ ഓപ്പണ് സ്പേസില് സമാപിക്കും. തുടര്ന്ന് അവിടെ പൊതുസമ്മേളനം നടക്കും. വെല്ഫെയര് പാര്ട്ടി ദേശീയ വൈസ് പ്രസിഡന്റ് ഹമീദ് വാണിയമ്പലം സമ്മേളനം ഉദ്ഘാടനം ചെയ്യും. ഫ്രറ്റേണിറ്റി ദേശീയ ജനറല് സെക്രട്ടറി ലുബൈബ് ബഷീര്, രാം നാരായണ് ഭാഗേലിന്റെ സഹോദരന് ശശികാന്ത് ഭാഗേല്, എഴുത്തുകാരന് കെ കെ ബാബുരാജ്, സാമൂഹിക പ്രവര്ത്തക അംബിക, ഫ്രറ്റേണിറ്റി സംസ്ഥാന പ്രസിഡന്റ് നഈം ഗഫൂര്, ആക്ടിവിസ്റ്റ് അഡ്വ. അമീന് ഹസ്സന്, വെല്ഫെയര് പാര്ട്ടി കോഴിക്കോട് ജില്ല പ്രസിഡന്റ് ടി കെ മാധവന് എന്നിവര് സംസാരിക്കും.