അടുത്ത 24 മണിക്കൂറില് ന്യൂനമര്ദ്ദം തീവ്ര ന്യൂനമര്ദ്ദമായി മാറും; വരും മണിക്കൂറില് ശക്തമായ മഴ
തിരുവനന്തപുരം: ബംഗാള് ഉള്ക്കടലില് ന്യൂനമര്ദ്ദം രൂപപ്പെട്ടു. സംസ്ഥാനത്ത് കനത്ത മഴയ്ക്ക് സാധ്യതയെന്ന് കാലാവസ്ഥ വകുപ്പ്. പടിഞ്ഞാറന് - മധ്യ ബംഗാള് ഉള്ക്കടലില് നില നില്ക്കുന്ന ന്യൂനമര്ദ്ദം അടുത്ത 24 മണിക്കൂറില് തീവ്ര ന്യൂനമര്ദ്ദമായി മാറുമെന്ന് കാലാവസ്ഥ വകുപ്പ് അറിയിച്ചു. ശനിയാഴ്ച വരെ ഒറ്റപ്പെട്ടയിടങ്ങളില് കനത്ത മഴയുണ്ടെന്നാണ് വിവരം.
അതേസമയം , സംസ്ഥാനത്ത് മഴക്കെടുതി രൂക്ഷമാവുകയാണ്.ഇടുക്കി എഴുകുംവയലില് ഒരേക്കര് കൃഷിഭൂമി ഒലിച്ചുപോയി. കോട്ടയത്ത് കിണറിന്റെ ഒരു ഭാഗം ഇടിഞ്ഞു.മലയോര മേഖലയില് ഉള്പ്പെടെ ജാഗ്രത തുടരുകയാണ്. പലയിടത്തും വെള്ളക്കെട്ടുകള് രൂപപ്പെട്ടുകഴിഞ്ഞു. ഇനിയും മഴ പെയ്യുന്ന ഇടങ്ങളില് മഴ തുടര്ന്നാല് മണ്ണിടിച്ചിലുണ്ടാകുമെന്നും വിദഗ്ധര് മുന്നറിയിപ്പു നല്കി. തിരുവനന്തപുരം, പത്തനംതിട്ട, കോട്ടയം, ഇടുക്കി എന്നീ ജില്ലകളില് ഓറഞ്ച് അലേര്ട്ട് പ്രഖ്യാപിച്ചു.