യുഎസ് ഇന്ത്യക്കുമേല്‍ ചുമത്തിയ തീരുവ ഇന്നുമുതല്‍ പ്രാബല്യത്തില്‍

വാഷിങ്ടണ്‍: ഡൊണാള്‍ഡ് ട്രംപ് ഇന്ത്യക്കുമേല്‍ പ്രഖ്യാപിച്ച പകരച്ചുങ്കം ബുധനാഴ്ച അര്‍ധരാത്രി പ്രാബല്യത്തില്‍വരും. നിലവിലെ 25 ശതമാനം പകരച്ചുങ്കത്തിനൊപ്പം 25 ശതമാനം കൂടി ചേരുമ്പോള്‍ ഇന്ത്യയില്‍നിന്ന് യുഎസിലേക്കു കയറ്റുമതിചെയ്യുന്ന ചരക്കുകളുടെ തീരുവ 50 ശതമാനമാകും. ഇതുമായി ബന്ധപ്പെട്ട് യുഎസ് ആഭ്യന്തരസുരക്ഷാമന്ത്രാലയം തിങ്കളാഴ്ച കരടുവിജ്ഞാപനമിറക്കി. യുഎസ് സമയം ബുധനാഴ്ച അര്‍ധരാത്രി വിപണിയിലെത്തുന്നതും സംഭരണശാലകളില്‍നിന്ന് യുഎസ് വിപണികളിലേക്ക് പുറപ്പെടുന്നതുമായ ഇന്ത്യന്‍ ചരക്കുകള്‍ക്കാണ് പകരച്ചുങ്കം ബാധകമാവുക.

ഈ മാസം ഏഴിനാണ് ഇന്ത്യക്കുമേല്‍് 25 ശതമാനം പകരച്ചുങ്കം യുഎസ് പ്രഖ്യാപിച്ചത്. റഷ്യയില്‍നിന്ന് എണ്ണയും പടക്കോപ്പുകളും വാങ്ങി യുക്രൈന്‍ യുദ്ധത്തെ സഹായിക്കുന്നെന്നാരോപിച്ചാണ് യുഎസിന്റെ നീക്കം. എണ്ണയുടെ കാര്യത്തില്‍ റഷ്യയുമായി നീക്കുപോക്കുണ്ടാക്കി യുഎസുമായുള്ള കരാറുണ്ടാക്കാന്‍ 21 ദിവസത്തെ സമയം നല്‍കിയിരുന്നു. ഇത് കഴിഞ്ഞ ദിവസം അവസാനിച്ചതോടെയാണ് ഈ നീക്കം.

യുഎസിന്റെ 50ശതമാന തീരുവ ഇന്ത്യയുടെ കയറ്റുമതിമേഖലയെയും വിതരണശൃംഖലയെയും ബാധിക്കുമെന്നാണ് വിലയിരുത്തല്‍. ചെരിപ്പ്, മൃഗങ്ങളില്‍നിന്നുള്ള ഉത്പന്നങ്ങള്‍, തുണിത്തരങ്ങള്‍, രത്നങ്ങള്‍, ആഭരണങ്ങള്‍, ചെമ്മീന്‍, തുന്നിയ വസ്ത്രങ്ങള്‍, തുകലുത്പന്നങ്ങള്‍, രാസവസ്തുക്കള്‍, വൈദ്യുത-മെക്കാനിക്കല്‍ യന്ത്രങ്ങള്‍ എന്നിവയുടെ കയറ്റുമതിയെ കൂടുതല്‍ ബാധിക്കും. ഇന്ത്യന്‍ കയറ്റുമതിയുടെ 66 ശതമാനവും ഈ മേഖലകളില്‍നിന്നെന്ന് ഗ്ലോബല്‍ ട്രേഡ് റിസര്‍ച്ച് ഇനിഷ്യേറ്റിവിന്റെ കണക്കില്‍ പറയുന്നു. അതേസമയം മരുന്ന്, ഇലക്ട്രോണിക് ഉത്പന്നങ്ങള്‍, ഊര്‍ജോത്പന്നങ്ങള്‍ എന്നിവയെ ബാധിച്ചേക്കില്ല. ഇന്ത്യയെക്കൂടാതെ ബ്രസീലിനും യുഎസ് 50 ശതമാനം തീരുവ ചുമത്തിയിട്ടുണ്ട്.