പാലക്കാട്ടെ സ്പിരിറ്റു വേട്ട; സിപിഎം ലോക്കല് കമ്മിറ്റി സെക്രട്ടറിയും പ്രതി
ഹരിദാസ് ഒളിവിലെന്ന് പോലിസ്
പാലക്കാട്: പാലക്കാട് ചിറ്റൂര് കമ്പാലത്തറയിലെ സ്പിരിറ്റു വേട്ടയില് സിപിഎം പെരുമാട്ടി ലോക്കല് കമ്മിറ്റി സെക്രട്ടറിയും പ്രതി. സിപിഎം പെരുമാട്ടി ലോക്കല് സെക്രട്ടറിയായ ഹരിദാസനെയാണ് കേസില് പ്രതി ചേര്ത്തത്. പ്രതിയായ ഹരിദാസന് ഒളിവിലാണെന്നും അന്വേഷണം നടത്തുന്നുണ്ടെന്നും പോലിസ് അറിയിച്ചു.
സംസ്ഥാനത്തുടനീളം കള്ള് വിതരണമുള്ളയാളാണ് ഹരിദാസനെന്ന് പോലിസ് പറഞ്ഞു. കഴിഞ്ഞ ദിവസമാണ് ചിറ്റൂര് കമ്പാലത്തറയില് 1,260 ലിറ്റര് സ്പിരിറ്റ് പിടിച്ചെടുത്തത്. മീനാക്ഷിപുരം സര്ക്കാര് പതിയില് കണ്ണയ്യന്റെ വീട്ടില് വെച്ചാണ് പോലിസ് സ്പിരിറ്റ് പിടിക്കൂടിയത്. സംഭവത്തില് കണ്ണയ്യന് പോലിസിന്റെ പിടിയിലായിരുന്നു. കണ്ണയ്യനെ ചോദ്യം ചെയ്തതിലാണ് കൂട്ടുപ്രതികളെക്കുറിച്ചുള്ള വിവരം പോലിസിനു ലഭിച്ചത്. ലോക്കല് സെക്രട്ടറി ഹരിദാസനും ഉദയനും ചേര്ന്നാണ് സ്പിരിറ്റെത്തിച്ചതെന്നാണ് കണ്ണയന്റെ മൊഴി. ഇതിന്റെ അടിസ്ഥാനത്തിലാണ് ഹരിദാസനെ പ്രതി ചേര്ത്തത്.