ഇറാന്റെ സൈനികശക്തിയെ കുറിച്ച് ഇസ്രായേലിനുണ്ടായിരുന്നത് ഊഹങ്ങള് മാത്രമോ?
റോബര്ട്ട് ഇന്ലകേഷ്
ഇറാന്റെ മിസൈല് ശേഖരം, വ്യോമ പ്രതിരോധം, പ്രതിരോധ ശേഷി എന്നിവയെക്കുറിച്ചുള്ള ഇസ്രായേലിന്റെ നിരന്തരം മാറിക്കൊണ്ടിരിക്കുന്ന കണക്കുകള് തെളിയിക്കുന്നത് തെഹ്റാന്റെ കൈവശമുള്ളത് എന്താണെന്ന് അവര്ക്ക് വ്യക്തമായ ധാരണയില്ലെന്നു തന്നെയാണ്. ഇസ്രായേലിന്റെ പ്രാരംഭ ആക്രമണ നടപടിയും അതിന്റെ ലക്ഷ്യങ്ങള് നേടുന്നതില് പരാജയപ്പെട്ടു.
ജൂണ് 12ലെ ഇറാനെതിരായ ആക്രമണത്തിന് ഏതാനും ദിവസങ്ങള്ക്കുശേഷം, ഇറാന്റെ കൈവശം 1,300 മിസൈലുകള് മാത്രമേ ഉള്ളൂ എന്ന് ഇസ്രായേല് നേതൃത്വം പറഞ്ഞിരുന്നു.
ഇസ്രായേലിന്റെ 'സൈനിക വിവരങ്ങളും വിദഗ്ധ വിശകലനവും' അടിസ്ഥാനമാക്കി സമീപകാലത്ത് സിഎന്എന് ഒരു ലേഖനം പ്രസിദ്ധീകരിച്ചിരുന്നു. അതില്, 'കഴിഞ്ഞ 14 മാസത്തിനിടെ ഇറാന് ഇസ്രായേലിനു നേരെ ഏകദേശം 700 മീഡിയം റേഞ്ച് ബാലിസ്റ്റിക് മിസൈലുകള് (MRBM) വിക്ഷേപിച്ചു, ഇനി 300 മുതല് 1,300 വരെ ശേഷിക്കുന്നു' എന്ന് റിപോര്ട്ട് ചെയ്തിരുന്നു.
ഇറാന് തൊടുത്തുവിട്ട മിസൈലുകളുടെ എണ്ണം ഒഴികെയുള്ള ഈ കണക്കുകള് ഊഹത്തെ അടിസ്ഥാനമാക്കിയുള്ളതല്ലാതെ മറ്റൊന്നുമല്ല. വാസ്തവത്തില്, അടിസ്ഥാന യുക്തി ഉപയോഗിച്ച്, സിഎന്എന് റിപോര്ട്ടും അവര് ഉദ്ധരിച്ച ഇസ്രായേലി ഡാറ്റയും സൂചിപ്പിക്കുന്നത്, ഒരു വര്ഷം മുമ്പ് ഇറാന് വിക്ഷേപിച്ച മിസൈലുകള്ക്ക് പകരമായി ഒരു മിസൈല് പോലും നിര്മിച്ചിട്ടില്ല എന്നാണ്.
തുടര്ന്ന്, വെള്ളിയാഴ്ച, ഇറാന്റെ കൈവശം ഇപ്പോഴും 28,000 ബാലിസ്റ്റിക് മിസൈലുകള് ഉണ്ടെന്ന് ഇസ്രായേല് പ്രധാനമന്ത്രി ബെഞ്ചമിന് നെതന്യാഹു അവകാശപ്പെട്ടു. അതേ ദിവസം തന്നെ, ഇറാന്-ഇസ്രായേല് യുദ്ധത്തിന്റെ തുടക്കത്തില് ഇറാന്റെ കൈവശം 2,500 ബാലിസ്റ്റിക് മിസൈലുകള് ഉണ്ടായിരുന്നുവെന്നും അതുവരെ 500 എണ്ണം വിക്ഷേപിച്ചിരുന്നുവെന്നും ഇസ്രായേല് സൈനിക മേധാവി ഇയാല് സമീര് അവകാശപ്പെട്ടു.
യുദ്ധത്തിന് ദിവസങ്ങള് മാത്രം ശേഷിക്കെ, ഇറാന്റെ മിസൈല് ലോഞ്ചറുകളില് പകുതിയെങ്കിലും നശിപ്പിച്ചതായി ഇസ്രായേല് അവകാശപ്പെട്ടു തുടങ്ങി. വിവിധ ഇസ്രായേലി കണക്കുകള് പ്രകാരം, ഇറാന്റെ 300 മുതല് 28,000 വരെ യുദ്ധോപകരണങ്ങള്ക്കുള്ള ലോഞ്ചറുകളുടെ എണ്ണം 400 മാത്രമാണെന്ന് പറയപ്പെടുന്നു. എത്ര ലോഞ്ചറുകള് നശിപ്പിക്കപ്പെട്ടു എന്ന കാര്യത്തില് ഇസ്രായേലിന്റെ കണക്കുകള് വിശ്വസിക്കാമെങ്കില്, 200 ലോഞ്ചറുകള് മാത്രമേ ശേഷിക്കുന്നുള്ളൂ.
ഇസ്രായേല് 200 ലോഞ്ചറുകള് നശിപ്പിച്ചതായി തെളിവുകളൊന്നുമില്ല. ഇസ്രായേല് വ്യോമസേന പുറത്തുവിട്ട ചില വീഡിയോകളില് അവ മോക്ക് ലോഞ്ചറുകളെ ആക്രമിക്കുന്നതായി പോലും കാണിച്ചിരിക്കുന്നു. ചില തെളിവുകള് പുറത്തുവന്നിട്ടുള്ളതിനാല് ലോഞ്ചറുകളെയും മിസൈല് സൈറ്റുകളെയും ലക്ഷ്യം വയ്ക്കുന്നതില് ഇസ്രായേല് വിജയിച്ചിരിക്കാമെന്ന് അനുമാനിക്കാം. അവയുടെ എണ്ണം ഇപ്പോഴും കൂട്ടിച്ചേര്ക്കപ്പെടുന്നില്ല.
റഷ്യക്ക് ഡ്രോണുകളും മിസൈലുകളും നല്കാന് തക്ക സൈനിക പുരോഗതി ഇറാന് നേടിയിട്ടുണ്ടെങ്കില്, ആയിരം കിലോമീറ്ററിലധികം അകലെയുള്ള ഇസ്രായേലി സൈനിക ലക്ഷ്യങ്ങളെ കൃത്യമായി ആക്രമിക്കാനുള്ള കഴിവ് ഇറാന് പ്രകടിപ്പിക്കുന്നുണ്ടെങ്കില്, ഈ അടിസ്ഥാന യുക്തി അനുസരിച്ച് 400 ലോഞ്ചറുകള് മാത്രമാണ് ഇറാന്റെ കൈവശം അവശേഷിക്കുന്നത് എന്ന് വിലയിരുത്തുന്നതില് അര്ഥമുണ്ടോ? അതോ ഏത് നിമിഷവും അവര്ക്കെതിരേ അമേരിക്കയ്ക്ക് ആക്രമണം നടത്താന് കഴിയുമെന്ന് അറിയാവുന്നതിനാല്, 1,300 ബാലിസ്റ്റിക് മിസൈലുകള് മാത്രമേ അവര് കൈവശം വയ്ക്കുന്നുള്ളൂ എന്നാണോ?
ഇറാന്റെ പക്കല് എത്ര മിസൈലുകളും ലോഞ്ചറുകളുമുണ്ടെന്ന് ഇസ്രായേലിന് ഒരു ധാരണയുമില്ല എന്നതാണ് യാഥാര്ഥ്യം. അങ്ങനെയാണെങ്കില്, പ്രചാരണ ലക്ഷ്യത്തോടെ മനപ്പൂര്വം തെറ്റായ കണക്കുകള് അവര് പ്രചരിപ്പിക്കുകയാണ്.
അതുപോലെ, 2023 ഒക്ടോബര് 7ന് ഗസയ്ക്കെതിരായ വംശഹത്യ ആരംഭിച്ചപ്പോള്, ഉപരോധിക്കപ്പെട്ട തീരദേശ പ്രദേശത്തിനടിയില് എത്ര മൈല് തുരങ്കങ്ങള് നിലവിലുണ്ടെന്നത് സംബന്ധിച്ച് ഇസ്രായേലികള് പരസ്പരവിരുദ്ധമായ വിവിധ അവകാശവാദങ്ങളാണ് ഉന്നയിച്ചത്.
2023 അവസാനത്തോടെ ഇസ്രായേല് പുറത്തുവിട്ട കണക്കുകള് പ്രകാരം ഗസ തുരങ്ക ശൃംഖലയുടെ ആകെ നീളം ഏകദേശം 400 കിലോമീറ്ററായിരുന്നു. എന്നാല് 2024ന്റെ തുടക്കത്തില്, ന്യൂയോര്ക്ക് ടൈംസ് ഈ വിഷയത്തില് പുതിയ ഇസ്രായേലി സൈനിക ഇന്റലിജന്സ് സ്രോതസ്സുകളെ ഉദ്ധരിച്ച് ഒരു ലേഖനം പ്രസിദ്ധീകരിച്ചു. തുരങ്കങ്ങളുടെ നീളവും എണ്ണവും വളരെ കൂടുതലാണെന്നും അവ 560-720 കിലോമീറ്ററുകള്ക്ക് ഇടയിലായിരിക്കാമെന്നും അതില് ചൂണ്ടിക്കാട്ടി.
ഉപരോധിക്കപ്പെട്ട തീരദേശ പ്രദേശത്ത് 2014ല് നടന്ന ആക്രമണത്തില് ഗസ മുനമ്പിനടിയില് 100 കിലോമീറ്റര് തുരങ്കങ്ങള് നിര്മിച്ചതായി കണ്ടെത്തിയതായി 2015 ഫെബ്രുവരിയില് ഇസ്രായേലി വൃത്തങ്ങള് അവകാശപ്പെട്ടതായി ലേഖനം ഉദ്ധരിക്കുന്നു. അതില് മൂന്നിലൊന്ന് ഭാഗം, അതിര്ത്തി വേര്തിരിച്ച് ഇസ്രായേലിന്റെ ഭാഗത്ത് നിര്മിച്ചിരുന്ന വേലിയുടെ വശത്തായിരുന്നു. പിന്നീട് ഈ തുരങ്കങ്ങളെല്ലാം അടച്ചുപൂട്ടി നശിപ്പിച്ചതായി ഇസ്രായേല് അവകാശപ്പെട്ടു.
ഗസയിലെ വംശഹത്യയുടെ കഴിഞ്ഞ 20 മാസങ്ങളില്, ഇസ്രായേല് സൈന്യവും യുഎസും അവര് ഗസയില് കണ്ടെത്തിയതോ ഇല്ലാതാക്കിയതോ ആയ എല്ലാത്തരം കണക്കുകളും ശതമാനങ്ങളും വെളിപ്പെടുത്തിയിട്ടുണ്ട്. പലപ്പോഴും പരസ്പരവിരുദ്ധവും അര്ഥശൂന്യവുമായ ഈ അവകാശവാദങ്ങള്, ഹമാസ് പോരാളികളുടെ എണ്ണം മുതല് ആര്പിജി റൗണ്ടുകള്, റോക്കറ്റുകള്, തുരങ്കങ്ങള് എന്നിവ വരെ ഉള്ക്കൊള്ളുന്നു. എന്നാല് ഒരു തെളിവും ഒരിക്കലും നല്കിയിട്ടില്ല.
ഇറാന്റെ കാര്യത്തിലും ഇതുതന്നെയാണ് സ്ഥിതി. ഇസ്രായേലികളും ഇസ്രായേല് അനുകൂല തിങ്ക് ടാങ്കുകളും അവരുടെ അമേരിക്കന് സഖ്യകക്ഷികളും ഇറാനിയന് ആയുധങ്ങളെക്കുറിച്ച് വളരെയധികം അറിവുള്ളവരാണെന്ന് അവകാശപ്പെടുന്നു. എന്നിട്ടും അവര് അവകാശപ്പെടുന്നതിന് ഒരു തെളിവുപോലും ഹാജരാക്കുന്നുമില്ല.
ഈ കണക്കുകള് വ്യാപകമായി പ്രചരിപ്പിക്കുമ്പോള്, അത് സാധാരണയായി പ്രചാരണ ലക്ഷ്യങ്ങള്ക്ക് മാത്രമായിരിക്കും. അതിനാല് അത് അവഗണിക്കണം. അതേസമയം, തങ്ങളുടെ ആയുധശേഖരത്തിന്റെ യഥാര്ഥ വലുപ്പം ആരെയും അറിയിക്കുന്നതില് ഇറാന് സത്യത്തില് പ്രയോജനമൊന്നുമില്ല. അതിനാല് ഇറാനികള് അത്തരം വിവരങ്ങള് സ്വയം വെളിപ്പെടുത്താന് സാധ്യതയില്ല.
ഇസ്രായേലി, അമേരിക്കന് ഉദ്യോഗസ്ഥരില്നിന്ന് വഞ്ചന പ്രതീക്ഷിക്കുന്നുണ്ടെങ്കിലും, ഈ കണക്കുകളും അവയെ അടിസ്ഥാനമാക്കിയുള്ള വിശകലനങ്ങളും ഉപയോഗിക്കുന്നതിലെ യഥാര്ഥ പ്രശ്നം, പാശ്ചാത്യ കോര്പറേറ്റ് മാധ്യമങ്ങള് ഈ കണക്കുകളെ അന്ധമായി സ്വീകരിക്കുകയും ഇസ്രായേലിന്റെ സൈന്യത്തെ വിശ്വസനീയമായ സ്രോതസ്സായി കണക്കാക്കുകയും ചെയ്യുന്നു എന്നതാണ്.
കടപ്പാട്: പലസ്തീന് ക്രോണിക്ക്ള്