കിരീടം ലക്ഷ്യമിട്ട് ടീം ഇന്ത്യ

ഹരാരെ: ഏകദിന ക്രിക്കറ്റ് പരമ്പരയ്ക്കു പിന്നാലെ സിംബാബ് വെക്കെതിരായ ട്വന്റിയിലും കിരീടം നേടുകയെന്ന ലക്ഷ്യത്തോടെ ഇന്ത്യ ഇന്ന് കളത്തിലിറങ്ങും. മൂന്നു മല്‍സരങ്ങളുടെ ട്വന്റി പരമ്പരയിലെ അവസാന മല്‍സരമാണ് ഇന്ന് ഹരാരെയില്‍ അരങ്ങേറുന്നത്. പരമ്പരയില്‍ ഇരു ടീമും ഒപ്പത്തിനൊപ്പമായതിനാല്‍ ഇന്ന് ജയിക്കുന്ന ടീമിന് കിരീടം സ്വന്തമാക്കാനാവും. ഒന്നാം ട്വന്റിയില്‍ സിംബാബ് വെ രണ്ട് റണ്‍സിന് ജയിച്ചപ്പോള്‍ രണ്ടാം ട്വന്റിയില്‍ 10 വിക്കറ്റിന്റെ ഉജ്ജ്വല ജയവുമായി ഇന്ത്യ തിരിച്ചുവരികയായിരുന്നു. ഏകദിന പരമ്പര തൂത്തുവാരിയ മഹേന്ദ്രസിങ് ധോണിയുടെ കീഴിലുള്ള ഇന്ത്യ ട്വന്റിയിലും വിജയക്കൊടി നാട്ടി നാട്ടിലേക്ക് മടങ്ങാനുള്ള തയ്യാറെടുപ്പിലാണ്. പ്രമുഖ താരങ്ങള്‍ക്ക് വിശ്രമം നല്‍കിയ ഇന്ത്യ പരിചയസമ്പന്നനായ ധോണിക്കു കീഴില്‍ യുവ  ടീമിനെയാണ് സിംബാബ് വെയിലേക്ക് അയച്ചിരിക്കുന്നത്.