സാംപിള്‍ സര്‍വേ അടുത്ത മാസം ആരംഭിക്കും

തിരുവനന്തപുരം: ദേശീയ സാംപിള്‍ സര്‍വേ ഓഫിസിന്റെ നേതൃത്വത്തില്‍ സാമൂഹിക-സാമ്പത്തിക സര്‍വേ അടുത്ത മാസം ഒന്നിന് ആരംഭിക്കും. ഇത്തവണത്തെ ആരോഗ്യ സര്‍വേയില്‍ പകര്‍ച്ചവ്യാധി വ്യാപനം സംബന്ധിച്ച സ്ഥിതിവിവരക്കണക്കുകള്‍ ശേഖരിക്കും. ഇതോടൊപ്പം സ്വച്ഛ്ഭാരത് മിഷന്റെ ഭാഗമായി മാലിന്യ സംസ്‌കരണം സംബന്ധിച്ച വസ്തുതകളും പരിശോധിക്കും. സര്‍വേ ജോലികള്‍ക്ക് നിയോഗിക്കപ്പെട്ട കേന്ദ്ര-സംസ്ഥാന ഉദ്യോഗസ്ഥരുടെ ദ്വിദിന പരിശീലന പരിപാടി തൈക്കാട് ഗസ്റ്റ്ഹൗസില്‍ ആരംഭിച്ചു. പ്രസവ ചികില്‍സയ്ക്കായി സ്വകാര്യ-സര്‍ക്കാര്‍ ആശുപത്രികളെ ആശ്രയിക്കുന്നവരുടെ വിവരം പ്രത്യേകം ശേഖരിക്കും. 60 വയസ്സിനു മുകളിലുള്ളവരുടെ ആരോഗ്യസ്ഥിതിയും സര്‍വേയില്‍ ശേഖരിക്കാനാണ് തീരുമാനം. വിദ്യാഭ്യാസ മേഖലയിലെ ചെലവ്, വിദ്യാഭ്യാസം ലഭിക്കാത്തവര്‍, ഏതു തരം വിദ്യാഭ്യാസ സ്ഥാപനങ്ങളെ ആശ്രയിക്കുന്നു തുടങ്ങിയ വിവരശേഖരണവും സര്‍വേയുടെ പരിധിയില്‍ വരും.