മരുഭൂമിയില്‍ കുടുങ്ങിയ രണ്ട് പേരെ ദുബയ് പോലീസ് രക്ഷപ്പെടുത്തി

മരുഭൂമിയില്‍ വഴിയറിയാതെ കുടുങ്ങി പോയ രണ്ട് ചൈനക്കാരെ ദുബയ് പോലീസ് രക്ഷപ്പെടുത്തി. ഇവര്‍ സഞ്ചരിച്ചിരുന്ന വാഹനം മരുഭൂമിയില്‍ കുടുങ്ങി പോകുകയായിരുന്നു. ഹത്ത, ഒമാന്‍ റോഡില്‍ ദുബയ് സ്‌പോര്‍ട്‌സ് ക്ലബ്ബിന് സമീപത്തുള്ള മരുഭൂമിയിലായിരുന്നു ഇവര്‍ കുടുങ്ങിയതെന്ന് ദുബയ് പോലീസിന്റെ രക്ഷാ പ്രവര്‍ത്തന വിഭാഗം ഉപ മേധാവി ലെഫ്റ്റനന്റ് കേണല്‍ അഹമ്മദ് ബുര്‍ഖിബ അറിയിച്ചു. രക്ഷാ പ്രവര്‍ത്തകര്‍ എത്തിയ ഉടനെ തന്നെ കുടുങ്ങി പോയ രണ്ട് പേര്‍ക്കും വെള്ളവും ഭക്ഷണവും നല്‍കുകയായിരുന്നു. മരുഭൂമിയിലൂടെ യാത്ര ചെയ്യുന്നവര്‍ കയ്യില്‍ സാറ്റലൈറ്റ് ഫോണ്‍, ടോര്‍ച്ച്, പ്രാഥമിക ചികില്‍സാ സാധനങ്ങള്‍, വാഹനം കുടുങ്ങി പോയാല്‍ ശരിയാക്കാനുള്ള ഉപകരണങ്ങള്‍ തുടങ്ങിയ കരുതണമെന്നും അദ്ദേഹം മുന്നറിയിപ്പ് നല്‍കി.