പരിക്ക്: കെവിന്‍ പീറ്റേഴ്‌സണ്‍ ഐപിഎല്ലില്‍ നിന്ന് പുറത്ത്

പൂനെ: പരിക്കേറ്റ റൈസിങ് പൂനെ സൂപ്പര്‍ജൈന്റ്‌സ് ബാറ്റ്‌സ്മാന്‍ കെവിന്‍ പീറ്റേഴ്‌സണിന് ഐപിഎല്ലില്‍ ഈ സീസണില്‍ ശേഷിക്കുന്ന മല്‍സരങ്ങളില്‍ കളിക്കാനാവില്ല. കാല്‍ക്കുഴയ്‌ക്കേറ്റ പരിക്കാണ് താരത്തിന് വിനയായത്.
ഇന്‍സ്റ്റഗ്രാമിലൂടെ പീറ്റേഴ്‌സണ്‍ തന്നെയാണ് ഇക്കാര്യമറിയിച്ചത്. വീല്‍ചെയറിലിരിക്കുന്ന ചിത്രവും താരം ഇന്‍സ്റ്റഗ്രാമില്‍ പങ്കുവച്ചിട്ടുണ്ട്. റോയല്‍ ചലഞ്ചേഴ്‌സ് ബാംഗ്ലൂരിനെതിരായ മല്‍സരത്തിനിടെയാണ് പീറ്റേഴ്‌സണിന് പരിക്കേറ്റത്. റണ്‍ എടുക്കാന്‍ ഓടുന്നതിനിടെ താരത്തിന്റെ കാല്‍ക്കുഴയ്ക്കു പരിക്കേല്‍ക്കുകയായിരുന്നു.