ദുബയ് ഷോപ്പിംഗ് ഫെസ്റ്റിവല്‍ ജനുവരി ഒന്ന് മുതല്‍

ദുബയ്: വിനോദ സഞ്ചാരികളുടെ മുഖ്യ ആകര്‍ഷകമായ 21 മത് ദുബയ് ഷോപ്പിംഗ് ഫെസ്റ്റിവല്‍ ജനുവരി ഒന്നിനാരംഭിക്കും. ദുബയ് മാര്‍ക്കറ്റില്‍ ഫെസ്റ്റിവലിനോടനുബന്ധിച്ച് ഇലക്ട്രോണിക്ക് അടക്കമുള്ള ഉല്‍പ്പന്നങ്ങള്‍ വന്‍ വിലക്കുറവിലാകും വില്‍പ്പന നടത്തുക.
ഫിബ്രുവരി ഒന്ന് വരെ നീണ്ട് നില്‍ക്കുന്ന ഉല്‍സവത്തോടനുബന്ധിച്ച് നിരവധി വിനോദ സഞ്ചാരികളാണ് ദുബയ് സന്ദര്‍ശനം നടത്തുക. ഫെസ്റ്റിവലിനോടനുബന്ധിച്ച് ഇത്തവണ യുവാക്കളെ ആകര്‍ഷിക്കാനായി ഫിലിം ഫെസ്റ്റിവല്‍, ഫാഷന്‍ ഷോ തുടങ്ങിയ പരിപാടികളും ഉള്‍പ്പെടുത്തിയിട്ടുണ്ട്. കൂടാതെ തെരുവ് പ്രദര്‍ശനങ്ങള്‍, വെടിക്കെട്ട് തുടങ്ങിയ പതിവ് പരിപാടികളും അരങ്ങേറും. ബ്യൂട്ടി വീക്ക്, ഗോള്‍ഡ് ആന്റ് ജ്വല്ലറി വീക്ക്, ഫാഷന്‍ വീക്ക്, പെര്‍ഫ്യൂം വീക്ക് എന്നിങ്ങനെ നാലാഴ്ചകളായി തരം തിരിച്ചായിട്ടായിരിക്കും ദുബയ് ഈ വര്‍ഷം ആഘോഷിക്കുക. ഇത്തവണ ഓരോ ദിവസവും നറുക്കെടുപ്പിലൂടെ 5 ലക്ഷം ദിര്‍ഹം പണവും, രണ്ട് ലക്ഷം ദിര്‍ഹം വില വരുന്ന ഇന്‍ഫിനിറ്റി കാറും നല്‍കുന്നുണ്ട്. നവവല്‍സരം ആഘോഷിക്കാനും ദുബയ് ഫെസ്റ്റിവല്‍ സന്ദര്‍ശിക്കാനും എത്തുന്ന വിനോദ സഞ്ചാരികളെ സ്വീകരിക്കാനായി വിമാന കമ്പനികളും വിമാനത്താവളങ്ങളും തയ്യാറായി കൊണ്ടിരിക്കുകയാണ്.