സ്വീവേജ് ട്രീറ്റ്‌മെന്റ് പ്ലാന്റിന്റെ നിര്‍മ്മാണത്തില്‍ നിയമലംഘനമെന്ന്; ഹൈക്കോടതി വിശദീകരണം തേടി

കൊച്ചി: ഫോര്‍ട്ട് കൊച്ചിയിലെ താലൂക്ക് ആശുപത്രിക്ക് സമീപം നിര്‍മ്മിക്കുന്ന സ്വീവേജ് ട്രീറ്റ്‌മെന്റ് പ്ലാന്റിന്റെ നിര്‍മ്മാണത്തില്‍ നിയമലംഘനമുണ്ടെന്നു ചൂണ്ടിക്കാട്ടി ഹൈക്കോടതിയില്‍ സമര്‍പ്പിച്ച ഹരജിയില്‍ സര്‍ക്കാരിന്റെയും കൊച്ചി കോര്‍പറേഷന്റെയും വിശദീകരണം തേടി.

കൊച്ചിന്‍ കോര്‍പ്പറേഷനോടും സര്‍ക്കാറിനോടും ഒരാഴ്ചയ്ക്കുള്ളില്‍ വിശദീകരണം നല്‍കാനാണ് ഹൈക്കോടതി നിര്‍ദ്ദേശം. സി എ ഫൈസല്‍ ആണ് അഡ്വക്കേറ്റ് പി. ഇ സജല്‍ മുഖേന ഹൈക്കോടതിയെ സമീപിച്ചത്.

ഹര്‍ജിക്കൊപ്പം ഹാജരാക്കിയ 2002 ലെ ഫോര്‍ട്ടുകൊച്ചി ആര്‍ഡിഒയുടെ ഉത്തരവ്, വില്ലേജ് ഓഫീസര്‍ നല്‍കിയ സര്‍ട്ടിഫിക്കറ്റ് എന്നിവ അടക്കമുള്ള രേഖകളുമായി ബന്ധപ്പെട്ട് പ്രത്യേക വിശദീകരണം നല്‍കണമെന്ന് കോടതി നിര്‍ദ്ദേശം നല്‍കി. കേസ് നവംബര്‍ മൂന്നിന് കോടതി വീണ്ടും പരിഗണിക്കും.