കഞ്ചാവുമായി രണ്ട് തമിഴ്‌നാട് സ്വദേശികള്‍ അറസ്റ്റില്‍

കണ്ണൂര്‍: 1.200 കിലോ കഞ്ചാവുമായി രണ്ട് തമിഴ്‌നാട് സ്വദേശികളെ തളിപ്പറമ്പ് എക്‌സൈസ് സംഘം പിടികൂടി.കാര്യാമ്പലത്ത് ഭാഗത്ത് നടത്തിയ റെയ്ഡിലാണ് തമിഴ്‌നാട് ദിണ്ടിഗല്‍ ജില്ലയിലെ വിരുവിട്ട് പോലിസ് സ്‌റ്റേഷന്‍ പരിധിയില്‍ താമസക്കാരായ പെരുമു എന്ന പെരുമാള്‍ തേവര്‍(50), രാമു എന്ന റോബര്‍ട്ട്(32) എന്നിവരെ അറസ്റ്റ് ചെയ്തത്. ഇടപാടുകാരെന്ന വ്യാജേന വേഷം മാറി രണ്ട് ദിവസമായി പ്രതികളെ നിരീക്ഷിച്ചാണ് കഞ്ചാവ് സഹിതം പിടികൂടിയത്. റെയിഡിനു തളിപ്പറമ്പ് എക്‌സൈസ് സിഐ എസ് കൃഷ്ണകുമാര്‍, പ്രിവന്റീവ് ഓഫിസര്‍മാരായ എബി തോമസ്, കെ പി മധുസൂദനന്‍, സിഇഒ മാരായ വി മനോജ്, കെ ടി എന്‍ മനോജ്, സി ജിതേഷ്, എം സുരേന്ദ്രന്‍, ഡ്രൈവര്‍ സി വി അനില്‍ കുമാര്‍ എന്നിവര്‍ പങ്കെടുത്തു. പ്രതികളെ ഇന്ന് കോടതിയില്‍ ഹാജരാക്കും.