ന്യൂസിലന്‍ഡ് ഓപണ്‍: സായി പ്രണീതിന് സെമിയില്‍ തോല്‍വി

ഓക്‌ലന്‍ഡ്: ന്യൂസിലന്‍ഡ് ഓപണ്‍ ബാഡ്മിന്റണ്‍ പുരുഷ സിംഗിള്‍സ് സെമിയില്‍ ഇന്ത്യയുടെ സായി പ്രണീതിന് തോല്‍വി. ഇന്തോനീസ്യയുടെ ജോനാഥന്‍ ക്രിസ്റ്റി ഒന്നിനെതിരേ രണ്ട് സെറ്റുകള്‍ക്ക് പ്രണീതിനെ തോല്‍പ്പിക്കുകയായിരുന്നു. ആദ്യ ഗെയിം സ്വന്തമാക്കിയ ശേഷമായിരുന്നു പ്രണീത് കളി കൈവിട്ടത്. സ്‌കോര്‍: 14 - 21, 21 -19, 21 -8. ആദ്യ സെറ്റ് പ്രണീത് അനായാസം ജയിച്ചെങ്കിലും രണ്ടാം സെറ്റില്‍ ശക്തമായി തിരിച്ചെത്തിയ ക്രിസ്റ്റി രണ്ടാം സെറ്റ് പിടിച്ചെടുത്തു. നിര്‍ണായകമായ മൂന്നാം സെറ്റിലും ക്രിസ്റ്റി ആധിപത്യം പുലര്‍ത്തിയപ്പോള്‍ പൊരുതാന്‍ പോലുമാവാതെ പ്രണീത് കീഴടങ്ങുകയായിരുന്നു. ഫൈനലില്‍ ചൈനയുടെ ലിന്‍ ഡാനാണ് ക്രിസ്റ്റിയുടെ എതിരാളി.