നാശനഷ്ടങ്ങള്‍ വിലയിരുത്താന്‍ കേന്ദ്രസംഘം ഇന്നു ജില്ലയില്‍

തൃശൂര്‍:  ഓഖി ചുഴലിക്കാറ്റില്‍ ജില്ലയിലുണ്ടായ നാശനഷ്ടങ്ങള്‍ വിലയിരുത്തുന്നതിനും കേന്ദ്ര സര്‍ക്കാരിന് റിപ്പോര്‍ട്ട് സമര്‍പ്പിക്കുന്നതിനും  നിയോഗിക്കപ്പെട്ട കേന്ദ്ര സംഘം ഇന്ന് ജില്ലയിലെ വിവിധ ഭാഗങ്ങളില്‍ സന്ദര്‍ശനം നടത്തും.
കേന്ദ്ര ഊര്‍ജ വകുപ്പ് ഡയറക്ടര്‍ എം എം ദകാഡെ, കേന്ദ്ര കൃഷിവകുപ്പ് ഡയറക്ടര്‍ ആര്‍ പി സിങ്  കേന്ദ്ര ഷിപ്പിങ്് വിഭാഗം ഡയറക്ടര്‍ ചന്ദ്രമണി എന്നിവരടങ്ങിയ സംഘമാണ് ജില്ലയിലെത്തുന്നത്. ഇവര്‍ക്കൊപ്പം ജില്ലാ കലക്ടര്‍ എ കൗശികന്‍ സംഘത്തിലുണ്ടാവും.
ജില്ലയിലെ തീരദേശമേഖലയായ കൊടുങ്ങല്ലൂരില്‍ നിന്ന് രാവിലെ 10.30നാണ് സംഘം വിലയിരുത്തല്‍ നടപടികളാരംഭിക്കുന്നത്. ഓഖി ദുരന്തമേഖലകളിലെ തകര്‍ന്ന വീടുകള്‍, റോഡുകള്‍, ജലസേചന മാര്‍ഗങ്ങള്‍, വൈദ്യുത സംവിധാനങ്ങള്‍, കാര്‍ഷിക രംഗം, കടല്‍ഭിത്തികള്‍, മല്‍സ്യ കര്‍ഷകരുടെ തകര്‍ന്ന ബോട്ടുകള്‍ മുതലായവയെക്കുറിച്ചെല്ലാം സംഘം പഠനം നടത്തും. ഇതോടനുബന്ധിച്ച് കലക്‌ട്രേറ്റില്‍ നടത്തിയ  അവലോകന യോഗത്തില്‍ ജില്ലാ കലക്ടര്‍ എ കൗശികന്‍ അധ്യക്ഷനായി.
എഡിഎം സി വി സജന്‍, അഗ്രികള്‍ച്ചറല്‍ വിഭാഗം ഡെപ്യൂട്ടി ഡയറക്ടര്‍ ടി ഉഷ, ജില്ലാ ഫിഷറീസ് വകുപ്പ് ഡെപ്യൂട്ടി ഡയറക്ടര്‍ എം ഐ സാജു, പഞ്ചായത്ത് ഡെപ്യൂട്ടി ഡയറക്ടര്‍ പി എന്‍ വിനോദ്കുമാര്‍, ജില്ലാ മൃഗസംരക്ഷണവകുപ്പ് ഓഫിസര്‍ എ എസ് വിജയകുമാര്‍, ജില്ലാ സപ്ലൈ ഓഫിസര്‍ അജിത്കുമാര്‍ മുതലായവര്‍ യോഗത്തില്‍ പങ്കെടുത്തു.