|    Jun 23 Sat, 2018 7:54 am
FLASH NEWS
Home   >  Kerala   >  

ഹാദിയയ്ക്കു മേല്‍ ഹൈക്കോടതി നടത്തിയത് കടുത്ത മനുഷ്യാവകാശ ലംഘനം: നാസറുദ്ദീന്‍ എളമരം

Published : 27th May 2017 | Posted By: shins

കൊച്ചി: ഹാദിയക്കു മേല്‍ ഹൈക്കോടതി നടത്തിയത് കടുത്ത മനുഷ്യാവകാശ ലംഘനമാണെന്ന് പോപുലര്‍ ഫ്രണ്ട് സംസ്ഥാന പ്രസിഡന്റ് നാസറുദ്ദീന്‍ എളമരം വാര്‍ത്താ സമ്മേളനത്തില്‍ പറഞ്ഞു. ഇന്ത്യന്‍ ജുഡീഷ്യറിയുടെ ചരിത്രത്തില്‍ തന്നെ കറുത്ത അധ്യായമായിരിക്കുകയാണ് ഹാദിയ കേസ്. നിലവില്‍ വീട്ടുകാരുടെ സംരക്ഷണയില്‍ കഴിയുന്ന ഹാദിയയുടെ ജീവന് ഭീഷണിയുണ്ട്. ആര്‍എസ്എസ് നിലപാടിനോട് കൂട്ട് നില്‍ക്കുന്ന പിതാവിന്റെയും മറ്റ് ബന്ധുക്കളുടെയും ഇടയില്‍ ഹാദിയ സുരക്ഷിതയല്ല. സര്‍ക്കാര്‍ മുന്‍കൈയെടുത്ത് ഹാദിയക്ക് സംരക്ഷണം ഏര്‍പ്പെടുത്തണമെന്നും ഇക്കാര്യം ചൂണ്ടിക്കാട്ടി മുഖ്യമന്ത്രിക്കും ഡിജിപിക്കും പരാതി നല്‍കുമെന്നും നാസറുദ്ദീന്‍ എളമരം അറിയിച്ചു. തന്റെ വിശ്വാസത്തിന് ശരിയെന്ന് തോന്നിയ വഴിയിലൂടെ സഞ്ചരിച്ച പ്രായപൂര്‍ത്തിയായ പെണ്‍കുട്ടിയെ തടഞ്ഞുവയ്ക്കുന്ന കോടതി നടപടിയെ ഭ്രാന്തമെന്നാണ് വിശേഷിപ്പിക്കേണ്ടത്. കഴിഞ്ഞ കാലങ്ങളില്‍ കോടതിവിധികളിലുണ്ടായിട്ടുള്ള പക്ഷപാതിത്വമാണ് ഹാദിയ കേസിലൂടെ വീണ്ടും ശക്തമായതെന്നും അദ്ദേഹം കൂട്ടിച്ചേര്‍ത്തു. ഇന്ത്യന്‍ ഭരണഘടന പൗരന്മാര്‍ക്ക് നല്‍കുന്ന മൗലിക അവകാശങ്ങളുടെ ലംഘനത്തിന് നീതിപീഠങ്ങള്‍ തന്നെ കൂട്ടു നില്‍ക്കുന്നത് വേദനയുണ്ടാക്കുന്നു. ഹാദിയക്കു നീതി തേടി ഏതറ്റംവരെയും സഞ്ചരിക്കും. ഇസ്‌ലാം മതം സ്വീകരിച്ചതിന്റെ പേരില്‍ വിവാഹം റദ്ദാക്കിയ വിധി അപക്വമാണ്. ഇസ്‌ലാമിക ശരീഅത്ത് പ്രകാരം വിവാഹം നടത്താനുള്ള സ്വതന്ത്ര്യം ഭരണഘടന അനുവദിച്ച് നല്‍കുന്നുണ്ട്. അത് റദ്ദ് ചെയ്യുവാന്‍ നിയമപരമായി കോടതികള്‍ക്ക് അധികാരമില്ല. പാസ്‌പോര്‍ട്ട് പോലുമില്ലാത്ത യുവതി സിറിയയിലേക്ക് പോവുമെന്ന് ചൂണ്ടിക്കാട്ടിയാണ് പിതാവ് ഹേബിയസ് കോര്‍പസ് ഫയല്‍ ചെയ്തത്. അതിന്റെ സാധ്യതകള്‍ പരിശോധിക്കാതെ കള്ള പ്രചാരണങ്ങള്‍ക്ക് കൂട്ട് നില്‍ക്കുന്ന നിലപാടുകളാണ് വിധി പ്രസ്താവിച്ച രണ്ട് ജഡ്ജിമാരും സ്വീകരിച്ചത്. 2016 ജനുവരിയില്‍ ഹൈക്കോടതിയുടെ തന്നെ മറ്റൊരു ബെഞ്ചിന് മുമ്പാകെ ഹാദിയ കേസ് പരിഗണനയില്‍ വന്നപ്പോള്‍ യുവതിയുടെ ഇഷ്ടപ്രകാരം വിവാഹക്കാര്യത്തില്‍ തീരുമാനമെടുക്കാനാണ് കോടതി വിധിച്ചത്. പെണ്‍കുട്ടിയുടെ മതപഠനവും സുരക്ഷിതത്വവും പരിശോധിച്ചതിന് ശേഷമായിരുന്നു വിധി. എന്നാല്‍, രണ്ടാംവട്ടം ഹാദിയയുടെ കേസ് കോടതിയുടെ മുന്നിലെത്തിയപ്പോള്‍ വാദം കേട്ട ജഡ്ജിമാരായ എബ്രഹാം മാത്യുവും സുരേന്ദ്രമോഹനനും തുടക്കം മുതല്‍ എതിരായ നിലപാടുകളാണ് സ്വീകരിച്ചത്. വിധി പ്രസ്താവിക്കാന്‍ നേരിട്ട കാലതാമസവും നീതി നിഷേധമാണ്. 150ഓളം ദിനങ്ങള്‍ അപ്രഖ്യാപിത തടങ്കലിനു ശേഷമാണ് വിവാഹബന്ധം അസാധുവാക്കിയ കോടതി നടപടി. ജനാധിപത്യ മര്യാദകള്‍ ലംഘിച്ച് കേസില്‍ വിധി പ്രസ്താവിച്ച ജഡ്ജിമാരെ ഇംപീച്ച് ചെയ്യണമെന്ന മറ്റ് സംഘടനകളുടെ നിലപാടിനെ പോപുലര്‍ ഫ്രണ്ട് പിന്തുണയ്ക്കുന്നതായും നാസറുദ്ദീന്‍ എളമരം അറിയിച്ചു. ഹാദിയക്കെതിരേയുള്ള നീതി നിഷേധത്തില്‍ പ്രതിഷേധിച്ച് മുസ്‌ലിം ഏകോപന സമിതി നാളെ നടത്തുന്ന ഹൈക്കോടതി മാര്‍ച്ചിന് പോപുലര്‍ ഫ്രണ്ട് പിന്തുണയക്കുന്നതായും അദ്ദേഹം പറഞ്ഞു. സംസ്ഥാന സെക്രട്ടറി എ അബ്ദുള്‍ സത്താര്‍, ഖജാഞ്ചി എം കെ അഷ്‌റഫ്, എറണാകുളം ജില്ലാ പ്രസിഡന്റ് കെ എ അഫ്‌സല്‍ വാര്‍ത്താ സമ്മേളനത്തില്‍ പങ്കെടുത്തു.

  ......................................................................................................................                                                                          
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക


Top stories of the day
Dont Miss