|    Aug 20 Sun, 2017 7:54 am
FLASH NEWS
Home   >  Todays Paper  >  page 9  >  

സിറിയയിലെ ഐഎസ് വിരുദ്ധ പോരാട്ടം; കരസേനയെ അയക്കാന്‍ സൗദി ഒരുക്കം തുടങ്ങി

Published : 6th February 2016 | Posted By: SMR

റിയാദ്: സിറിയയിലെ ഐഎസ് വിരുദ്ധ പോരാട്ടത്തിനു കരസൈന്യത്തെ അയക്കാന്‍ സൗദി ഒരുങ്ങുന്നു. യുഎസ് സഖ്യസൈന്യം വാഗ്ദാനം സ്വീകരിക്കുകയാണെങ്കില്‍ ആഴ്ചകള്‍ക്കകം സിറിയയില്‍ സൗദി കരസൈന്യത്തെ വിന്യസിക്കും. അസദിനെ എതിര്‍ക്കുന്ന വിമതരെ പിന്തുണയ്ക്കുന്ന സൗദി 2014 സപ്തംബര്‍ മുതല്‍ ഇവിടെ വ്യോമാക്രമണം നടത്തുന്നുണ്ട്.
ഐഎസിനെ തുരത്താന്‍ കരസൈന്യത്തെ അയക്കാന്‍ ഒരുക്കമാണെന്നു സൈനിക വക്താവ് ബ്രിഗേഡിയര്‍ ജനറല്‍ അഹമ്മദ് അസരി അല്‍ജസീറയോട് പറഞ്ഞു. യുഎസ് നേതൃത്വത്തിലുള്ള ഐഎസ് വിരുദ്ധ പോരാട്ടത്തില്‍ പങ്കാളിയാകാനുള്ള സൗദിയുടെ സന്നദ്ധത അറിയിക്കുകയാണെന്നും അദ്ദേഹം പറഞ്ഞു. യമനില്‍നിന്നാര്‍ജിച്ച അനുഭവത്തിന്റെ പശ്ചാത്തലത്തിലാണ് കരസൈന്യത്തെ അയക്കുന്നതെന്നും അദ്ദേഹം വ്യക്തമാക്കി.
ഐഎസിനെ പരാജയപ്പെടുത്താന്‍ വ്യോമാക്രമണം മാത്രം മതിയാവില്ലെന്നും കരസൈന്യവും രംഗത്തുവരേണ്ടതുണ്ടെന്നും അദ്ദേഹം വ്യക്തമാക്കി. എന്നാല്‍, എത്ര പേരെ അയക്കുമെന്ന് അദ്ദേഹം വ്യക്തമാക്കിയില്ല.
സൗദി വാഗ്ദാനം അടുത്തയാഴ്ച ജനീവയില്‍ യുഎസ് വിളിച്ചു ചേര്‍ക്കുന്ന സഖ്യസൈനിക രാഷ്ട്രങ്ങളുടെ പ്രതിരോധ മന്ത്രിമാരുടെ യോഗത്തില്‍ ചര്‍ച്ച ചെയ്യും. വിമതര്‍ക്ക് ആയുധവും പണവും നല്‍കി സിറിയന്‍ സംഘര്‍ഷത്തിനു മൂര്‍ച്ച കൂട്ടിയ പശ്ചിമേഷ്യന്‍ രാജ്യങ്ങള്‍ ചുവടു മാറ്റുന്നത് സ്വാഗതാര്‍ഹമാണെന്നു മുന്‍ യുഎസ് പ്രതിരോധ അസിസ്റ്റന്റ് സെക്രട്ടറി ലോറന്‍സ് കോര്‍ബ് അറിയിച്ചു. ഇതു വലിയ വ്യതിയാനമാണെന്നും അദ്ദേഹം വ്യക്തമാക്കി.
സിറിയന്‍ പ്രസിഡന്റ് ബശ്ശാറുല്‍ അസദിനെ പിന്തുണച്ച് വിമതര്‍ക്കെതിരേ ശക്തമായ വ്യോമാക്രമണം നടത്തുന്ന റഷ്യയ്‌ക്കെതിരേയുള്ള താക്കീതാണിതെന്നും അദ്ദേഹം കൂട്ടിച്ചേര്‍ത്തു. സൗദി വാഗ്ദാനം യുഎസ് പ്രതിരോധ സെക്രട്ടറി ആഷ്ടണ്‍ കാര്‍ട്ടന്‍ സ്വാഗതം ചെയ്തു.

                                                                               
വായനക്കാരുടെ അഭിപ്രായങ്ങള്‍ താഴെ എഴുതാവുന്നതാണ്. മംഗ്ലീഷ് ഒഴിവാക്കി മലയാളത്തിലോ ഇംഗ്ലീഷിലോ എഴുതുക. ദയവായി അവഹേളനപരവും വ്യക്തിപരമായ അധിക്ഷേപങ്ങളും അശ്ലീല പദപ്രയോഗങ്ങളും ഒഴിവാക്കുക .വായനക്കാരുടെ അഭിപ്രായ പ്രകടനങ്ങള്‍ക്കോ അധിക്ഷേപങ്ങള്‍ക്കോ അശ്ലീല പദപ്രയോഗങ്ങള്‍ക്കോ തേജസ്സ് ഉത്തരവാദിയായിരിക്കില്ല.
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക